Posted: 05/03/2012 08:36 PM IST

కింగ్‌ఫిషర్‌ ఎయిర్‌లైన్‌కు చెందిన ఇంజినీరింగ్‌ సిబ్బందితో పాటు, పైలెట్లు, వివిధ శాఖలకుచెందిన ఉద్యోగులు వేతనాలు చెల్లించనందుకు లేబర్‌కోర్డుకు వెళ్లాలనే ఆలోచనలో ఉన్నారు. ఏప్రిల్‌ నెల ముగిసిపోయినా తమకు వేతనాలు అందలేదని వారు వాపోతున్నారు. గత నాలుగు నెలల నుంచి (జనవరి - ఏప్రిల్‌) వరకు వేతనాల బకాయిలు పేరుకుపోయాయని. యాజమాన్యం చొరవ తీసుకుని తమకు వేతనాలు ఎప్పుడు చెల్లిస్తామన్న వివరాలు చెప్పకుండా నిర్లక్ష్యం వహిస్తున్నారని... పరిస్థితి మళ్లీ మొదటికి వచ్చిందని ఎయిర్‌లైన్‌ సిబ్బంది చెబుతున్నారు. పైలెట్లు లేబర్‌కోర్డు జోక్యం చేసుకోవాలని కోరుతోంది.తమకు రావాల్సిన బకాయిలు త్వరగా చెల్లించాలని వారు లేబర్‌కోర్టును ఆశ్రయించాలనుకుంటున్నారు.

త్వరలోనే కింగ్‌ఫిషర్‌కు చెందిన వివిధ శాఖలకు చెందిన ఉద్యోగులను కూడగట్టుకుని భవిష్యత్‌ కార్యాచరణకు చేపట్టాల్సిన నిర్ణయాలు తీసుకుంటామని చెప్పారు. గత నెలలోనే ఒక శాఖకు చెందిన ఉద్యోగులు వారిలో పైలెట్లు, ఇంజినీర్లు ఏప్రిల్‌ 20వ తేదీలోగా తమ వేతనాలు చెల్లించకపోతే తాము ఉద్యమం చేపడతామని హెచ్చరించారు. చివరి నిమిషంలో కింగ్‌ఫిషర్‌ చైర్మన్‌ విజయ్‌మాల్యా జోక్యం చేసుకుని ఒక వారంలోపే వేతనాలు చెల్లిస్తామని హామీ ఇవ్వడంతో పరిస్థితి అదుపులోకి వచ్చింది. ఎయిర్‌లైన్‌కు చెందిన 200 మంది ఇంజినీర్లకు డిసెంబర్‌ నుంచి ఇప్పటి వరకు వేతనాలు చెల్లించలేదని ఉద్యోగులు చెబుతున్నారు. విజయ్‌మాల్యా హామీ ఇచ్చినా డిసెంబర్‌ నెల జీతాలు చెల్లించలేదని వారు వాపోతున్నారు. ఎయిర్‌లైన్‌ సుమారు రూ.7,057.08 కోట్ల అప్పుల్లో కూరుకుపోయింది. అంతర్జాతీయ సర్వీసులను పూర్తిగా రద్దు చేసింది. దేశీయ విమాన సర్వీసుల్లో చాలా మటుకు కోత విధించింది.