Posted: 02/03/2012 08:44 PM IST

మాజీ టెలికామ్ మంత్రి రాజా హయాంలో జారీ చేసిన 2జి లైసెన్స్‌లను (122) రద్దు చేస్తూ సుప్రీంకోర్టు ఇచ్చిన తీర్పు వల్ల టెలికామ్ రంగంలో నెలకొన్న అనిశ్చితి తొలిగిపోతుందని పారిశ్రామిక, వాణిజ్య సంఘాలు, టెలికామ్ రంగ నిపుణులు అభిప్రాయపడుతున్నారు. సుప్రీంకోర్టు తీర్పు దరిమిలా ప్రభుత్వ పాలసీలపై స్పష్టత ఏర్పడే అవకాశం ఉన్నందున విదేశీ ఇన్వెస్టర్లకు అవకాశాలు లభిస్తాయని ఈ పారిశ్రామిక, వాణిజ్య సంఘాలు పేర్కొన్నాయి.

టెలికామ్ రంగం వృద్ధికి సుప్రీంకోర్టు తీర్పు ఉపయోగపడుతుందని అన్నారు. ఈ తాజా పరిణామాలతో టెలికామ్ వినియోగదారులు ఇబ్బందిపడకుండా చూసేందుకు తగిన చర్యలు తీసుకోవాలని ఈ విషయంలో ప్రభుత్వానికి ట్రాయ్‌కి సహకరించేందుకు తాము సిద్ధంగా ఉన్నామని సిఐఐ, అసోచామ్ ఫిక్కి తెలిపాయి. కొత్త వాతావరణంలో ప్రభుత్వం భారీ ఎత్తున టెలికామ్ రంగంలోకి విదేశీ, స్వదేశీ పెట్టుబడులను ప్రభుత్వం ఆహ్వానించాలని సిఐఐ సూచించింది. దేశంలో 90 కోట్ల మందికిపైగా ఉన్న టెలికామ్ వినియోగదారుల్లో కేవలం 5 శాతం మంది మాత్రమే సుప్రీంకోర్టు తీర్పు వల్ల ప్రభావితమయ్యే అవకాశం ఉందని సిఐఐ తెలిపింది. టెలికామ్ రంగంలో దీర్ఘకాలిక ఇన్వెస్టర్లకు కోర్టుతీర్పు ప్రయోజనకారిఅని అసోచామ్ వ్యాఖ్యానించింది. స్పెక్ట్రమ్ వంటి అరుదైన జాతీయ వనరులను కేటాయించడంలో పోటీకి ఇవ్వాల్సిన ప్రాధాన్యతను కోర్టు తీర్పు స్పష్టం చేసిందని ఫిక్కి తెలిపింది.