వెంకయ్య కష్టం గురించి బాబుకేం తెలుసు?

Posted: 09/19/2016 03:28 PM IST

Cm chandrababu naidu about venkaiah naidu at bel lay stone

ఏపీకి సాయం విషయంలో కేంద్రమంత్రి వెంకయ్యనాయుడుగారిని కొంతమంది విమర్శిస్తున్నారు. ఆయన్ని విమర్శిస్తే మనకొచ్చే లాభమేంటని అంటున్నారు ఏపీ సీఎం చంద్రబాబు నాయుడు. కృష్ణా జిల్లా నెమ్మలూరులో బీహెచ్ఈఎల్ సంస్థ ఏర్పాటుకు భూమి పూజ జరిగింది. దీనికి వెంకయ్యనాయుడు కూడా హాజరయ్యాడు. ఈ సందర్భంగా చంద్రబాబు ఈ ఆసక్తికర వ్యాఖ్యలు చేశారు.‘‘నేను అడుగుతున్నాను. ఆయన ఎక్కడ తప్పుచేశారని అడుగుతున్నాను’’ అంటూ మాట్లాడారు.

'రాష్ట్రానికి మేలు చేసేందుకు అనునిత్యం కేంద్రంతో మాట్లాడుతూ, అక్కడ జరిగే సమావేశాల్లో ఈ విషయాన్ని ప్రస్తావిస్తున్నారు. వెంకయ్యనాయుడును విమర్శించేవారు ఈ విషయాన్ని గుర్తుపెట్టుకుని మాట్లాడాలి' అని సూచించారు. రాష్ట్రాభివృద్ధి కోసం టీడీపీ ఏనాడూ రాజీపడలేదని, ఈ విషయాన్ని ప్రతిఒక్కరూ గుర్తించాలని అన్నారు. ఏపీ ప్యాకేజ్ కు సంబంధించి చట్టబద్ధత కల్పించాలని, అన్ని విషయాలను ఫాస్ట్ ట్రాక్ లో పెట్టాలని వెంకయ్యనాయుడికి మరోసారి విజ్ఞప్తి చేస్తున్నానని చంద్రబాబు అన్నారు.

కాగా, కృష్ణా జిల్లా నెమ్మలూరులో బీహెచ్ఈఎల్(బెల్) కర్మాగార ఏర్పాటుకు ప్రభుత్వం 50 ఎకరాల విస్తీర్ణంలో రూ.300 కోట్లను కేటాయించింది. రక్షణ శాఖకు అవసరమైన అడ్వాన్స్ నైట్ విజన్ లెన్స్ ను ఈ కర్మాగారంలో తయారు చేయనున్నారు. రెండేళ్లలో పూర్తిచేయాలని లక్ష్యంగా పెట్టుకున్న ఈ ప్రాజెక్టు ద్వారా వందల సంఖ్యలో ఉద్యోగాలు వస్తాయని, తద్వారా యువత బాగుపడుతుందని చంద్రబాబు వివరించారు. ఈ కార్యక్రమంలో కేంద్ర మంత్రులు వెంకయ్య నాయుడు, సుజనా చౌదరి, ఎంపీ కొనకళ్ల నారాయణ, ఎమ్మెల్యేలు, ఎమ్మెల్సీలు పాల్గొన్నారు.