బిర్యానీ కోసం ఏకంగా 42 బస్సులను తగలబెట్టింది

Posted: 09/19/2016 10:10 AM IST

Woman arsonist set afire 42 buses for biryani and rs 100

సెప్టెంబర్ 12 కర్ణాటకలో కావేరి చిచ్చు దెబ్బకి రాష్ట్రం మొత్తం గజగజ వణికిపోయింది. రెచ్చిపోయిన ఆందోళనకారులు పెను విధ్వంసమే సృష్టించారు. వారి ఆగ్రహ జ్వాలల్లో సుమారు 42 బస్సులు మాడిమసైపోయాయి. అయితే ఆ గొడవలు చల్లారక దానికి కారకులుగా భావిస్తున్న దాదాపు 400 మందిని పోలీసులు అరెస్ట్ చేశారు. ఇందులో ఒక పాతికేళ్ల యువతి కూడా ఉంది. ఆమె పేరు సి.భాగ్య, కూలీ పనులు చేసుకునే యువతి. మరి అలాంటి యువతికి నిజంగా కావేరి సెంటిమెంట్ ఉందా? అసలు ఆమె ఆందోళనల్లో ఎందుకు పాల్గొంది? తెలిస్తే మాత్రం నిజంగా షాకవుతారు.

కేవలం ప్లేట్ బిర్యానీ, రూ. 100 కోసం ఆమె ఈ పెను విధ్వంసంలో భాగస్వామిగా మారిందట. కేపీఎన్ బస్ గ్యారేజ్ కి సమీపంలోని గిరినగర్ ప్రాంతంలో తన తల్లిదండ్రులతో కలిసి ఉంటున్న భాగ్య కూలీ పనిచేసుకుంటూ కుటుంబాన్ని పోషిస్తోంది. అయితే తన కూతురికి ఏ పాపం తెలీదని, కొందరు మభ్యపెట్టి తీసుకెళ్లారని చెబుతోంది భాగ్య తల్లి ఎల్లమ్మ. ఆరోజు భాగ్య అప్పుడే పని నుంచి ఇంటికి వచ్చింది. మధ్యాహ్నం సమయంలో కొంతమంది వచ్చి ఆమెకు బిర్యానీ పెట్టించారు. ఆపై వంద రూపాయలు ఇచ్చి నిరసనల్లో పాల్గొనేందుకు తీసుకెళ్లారు అని వివరించింది.

ఇక దాడులకు సంబంధించిన సీసీ టీవీ పుటేజీలను పరిశీలించిన పోలీసులు అందులో పాల్గొన్న వారిని అరెస్ట్ చేస్తూ వస్తున్నారు. భాగ్యతోపాటు మరికొంత మంది మహిళలు పాల్గొన్నట్లు తెలుస్తున్నప్పటికీ అందుకు సంబంధించి స్పష్టమైన ఆధారాలు మాత్రం దొరకలేదు. బస్సు డిపోపై దాడికి వెళ్లిన భాగ్య, తనతో వచ్చిన వారిని రెచ్చగొట్టినట్టు కేపీఎన్ ఉద్యోగులు తీసిన మొబైల్ వీడియోల్లో స్పష్టంగా కనిపిస్తోంది. అడ్డుకోవాలని వారు ప్రయత్నించగా, వారిపై డీజిల్ పోసి కాల్చేస్తామని బెదిరించినట్లు ఉద్యోగులు చెబుతున్నారు. ఇక నిరసనకారులకు డబ్బిచ్చి దాడులకు పుసిగొల్పినట్లు తెలుస్తుండటంతో, దీనివెనుక భారీ కుట్రదాగుందన్న పోలీసుల అనుమానాలు దాదాపు ఖరారైనట్లే కనిపిస్తోంది.