బన్నీ మూవీకి రెహమాన్ మ్యూజిక్

Posted: 10/16/2017 11:48 AM IST

స్టయిలిష్ స్టార్ అల్లు అర్జున్ కోలీవుడ్ డెబ్యూ రెగ్యులర్ షూటింగ్ వచ్చే ఏడాది నుంచి అన్న వార్త వెలువడగానే తెలుగు ప్రేక్షకుల్లో ఓ ఆత్రుత మొదలైంది. ముఖ్యంగా ఎప్పటి నుంచో తమ హీరోను కోలీవుడ్ తెరపై చూడాలనుకుంటున్న అభిమానుల కల నెరవేరబోతుంది. ఈ నేపథ్యంలో బన్నీ కూడా తన కోరికను తీర్చుకోబోతున్నాడా? అన్న ప్రశ్నలు మొదలయ్యాయి.

ఓ కోలీవుడ్ ప్రముఖ పత్రిక ప్రచురించిన కథనం ప్రకారం... బన్నీ లింగుసామి చిత్రం కోసం ఆస్కార్ విజేత ఏఆర్ రెహమాన్ ను సంగీత దర్శకుడిగా తీసుకోబోతున్నారంట. ఈ మేరకు లింగుసామి రెహమాన్ తో చర్చించటం.. ఆయన ఓకే చెప్పటం జరిగిపోయాయని అందులో పేర్కొంది. అయితే చిరు సైరాను లైట్ తీస్కున్న రెహమాన్ బన్నీ మూవీకి ఎలా ఓకే చెప్పాడనే అనుమానాలు వ్యక్తం అవుతుండగా.. వచ్చే ఏడాది సమ్మర్ లో ప్రాజెక్టు మొదలయ్యేది కాబట్టి అప్పటి వరకు డేట్లు అడ్జస్ట్ చేస్తాడని అందులో రాసింది.

అయితే తాజా వార్తపై అధికారిక ప్రకటన వెలువడకపోవటంతో అది నిజం కాదనే అంతా అనుకుంటున్నారు.

ఫ్యాన్స్ కి కావాల్సింది అదే...

ఇక బన్నీ సినిమా అంటే సినిమాలో పాటలు ప్రధానంగా ఉంటాయి. దానికి తగ్గట్టే బన్నీ కూడా పాటలపై ప్రత్యేకమైన ఫోకస్ పెడతాడు. అందుకే అతడి సినిమాల్లో మ్యూజికల్ హిట్లెక్కువ. ఒకవేళ సినిమా ఫ్లాపయినా పాటలు మాత్రం జనాలను బాగానే ఆకట్టుకుంటాయి. రెహమాన్ సంగీత దర్శకత్వంలో నటించాలన్నది బన్నీకి ఎప్పటి నుంచో కల. ఈ విషయాన్ని పలు ఇంటర్వ్యూల్లో బన్నీ స్వయంగా చెప్పాడు కూడా. ఒకవేళ ఈ సినిమాకు రెహమాన్ సంగీతం అన్న వార్త నిజమయితే మాత్రం ఆ ఆల్బమ్ సౌత్ లో ఓ ఛార్ బస్టర్ గా నిలిచిపోవటం ఖాయమనే చెప్పొచ్చు. ప్రస్తుతం బన్నీ రైటర్ వక్కంతం వంశీ తొలిసారి డైరెక్ట్ చేస్తున్న ‘నా పేరు సూర్య.. నా ఇల్లు ఇండియా’ సినిమా షూటింగ్ లో పాల్గొంటున్నాడు.