‘చైనా పరిస్థితే బాగాలేదు.. కేసీఆర్ వెళ్లి ఏం చేస్తారు?’

Posted: 09/08/2015 12:56 PM IST

తెలంగాణ రాష్ట్ర ముఖ్యమంత్రి కేసీఆర్ తన భారీ బృందంతో ప్రత్యేక విమానంలో చైనాకు వెళ్లారు. దాదాపు 10 గంటలపాటు సుదీర్ఘప్రయాణం తర్వాత అక్కడికి చేరుకున్న ఆయన.. వెంటనే బిజీ అయిపోయారు. రాష్ట్రానికి పెట్టుబడులు తేవడమే లక్ష్యంగా మొదలైన ఆయన పర్యటనలో అప్పుడు చైనాలోని భారత రాయబారితో భేటీ కూడా జరిగింది. అంతేకాదు.. కొందరు ప్రవాస భారతీయులతోపాటు పారిశ్రామికవేత్తలను కలిసి పెట్టుబడులపై చర్చించనున్నాడు. ఇలా ఈ విధంగా కేసీఆర్ అక్కడ బిజీగా గడుపుతుంటే.. ఇక్కడ ఆయన పర్యటనపై మాజీ ఎంపీ పొన్న ప్రభాకర్ తీవ్రస్థాయిలో మండిపడ్డారు.

కేసీఆర్ బయలుదేరిన విమానం ఖర్చు అక్షరాలా రెండున్నర కోట్ల రూపాయలని గుర్తుచేసిన పొన్నం.. సీఎం పర్యటనపై నిప్పుడు చెరిగారు. కేసీఆర్ చైనా వెళ్ళిన తీరు రాచరికాన్ని గుర్తు చేస్తోందని విమర్శించారు. తెలంగాణ రాష్ట్రంలో ఒక వైపు రైతులు కష్టాలతో సహజీవనం చేస్తూ, ఆత్మహత్యలకు పాల్పడుతుంటే... కేసీఆర్ కు చైనా పర్యటన కావాల్సి వచ్చిందా? అని ప్రశ్నించారు. అసలు చైనా పరిస్థితే దారుణంగా ఉంది.. మార్కెట్లు కుప్పకూలిపోయాయి.. ఇలాంటి పరిస్థితుల్లో చైనా నుంచి కేసీఆర్ ఏం పెట్టుబడులు తీసుకొస్తారని పొన్నం ఎద్దేవా చేశారు. రాష్ట్ర సమస్యల్ని పరిష్కరించాల్సిందిపోయి.. పర్యటనల పేరుతో విదేశాల్లో చక్కర్లు కొడుతున్నారని ఆయన ఆరోపించారు. మరి.. పొన్నం చేసిన వ్యాఖ్యలపై ఎలాంటి దుమారాలు రేగుతాయో? అన్న విషయంపై రాజకీయవర్గాల్లో ఆందోళన నెలకొంది.

AS