‘టీఆర్ఎస్ నేతలూ.. ఒళ్లు దగ్గర పెట్టుకోండి’

Posted: 09/07/2015 12:58 PM IST

అప్పుడప్పుడు తెరముందు కనిపించి సంచలన వ్యాఖ్యలు చేసే కాంగ్రెస్ పార్టీ గ్రేటర్ అధ్యక్షుడు, మాజీమంత్రి దానం నాగేందర్.. తాజాగా తన ఘాటు పదజాలంతో కూడిన హెచ్చరికలను తెలంగాణలో అధికార టీఆర్ఎస్ నేతలకు జారీ చేశారు.

ఇటీవల పాలమూరు జడ్పీ సమావేశంలో భాగంగా కాంగ్రెస్ పార్టీ ఎమ్మెల్యే చిట్టెం రామ్మోహన్ రెడ్డిపై టీఆర్ఎస్ ఎమ్మెల్యే గువ్వల బాలరాజు దాడి చేసిన విషయం తెలిసిందే. వారిద్దరి మధ్య వాగ్యుద్ధం నెలకొనగా ఒకరికొకరు తీవ్రంగా తిట్లు సంధించుకున్నారు. ఈనేపథ్యంలోనే రామ్మోహన్ చెంపపై బాలరాజు ఛళ్లుమనిపించారు. ఈ దాడికి నిరసనగా టీ కాంగ్రెస్ రాష్ట్రవ్యాప్తంగా ఆందోళనలకు దిగింది. ఈ సందర్భంగానే హైదరాబాదులో జరిగిన ఆందోళనలో పాల్గొన్న దానం నాగేందర్.. అధికార పార్టీ నేతల వైఖరిపై నిప్పులు చెరిగారు.

‘టీఆర్ఎస్ నేతలు ఒళ్లు దగ్గరపెట్టుకుని ప్రవర్తించాలి. లేకపోతే అధికారం పోయాక వారికీ ఇబ్బందులు తప్పవు. కాంగ్రెస్ నేతలపై టీఆర్ఎస్ నేతలు వేధింపులకు పాల్పడుతున్నారు. ప్రశ్నించినందుకే మా ఎమ్మెల్యేపై దాడి చేశారు. ఈ దాడులను ఇక ఎంతమాత్రం సహించేది లేదు’ అని దానం ధ్వజమెత్తారు. మరి.. ఈయన వ్యాఖ్యలపై టీఆర్ఎస్ నేతలు ఏ విధంగా స్పందిస్తారో వేచి చూడాల్సిందే!