ప్రజాకూటమి- టీఆర్ఎస్ ఒకే టాను ముక్కలు

Posted: 11/26/2018 03:47 PM IST

ప్రజాకూటమికి చెందిన పార్టీలన్నీ ఒకే టాను ముక్కలని బీజేపి జాతీయ అధికార ప్రతినిధి, రాజ్యసభ సభ్యుడు జీవీఎల్ నరసింహారావు విమర్శించారు. కర్ణాటకలో పరస్పరం విమర్శలు చేసుకున్న జేడీఎస్ పార్టీ, కాంగ్రెస్ పార్టీలు బీజేపిని అధికారంలోకి రానీయకుండా ఎలా కుట్ర పన్నారో.. అదే కుట్రను ప్రస్తతం ఇక్కడ తెలంగాణలో కూడా పునరావృతం చేస్తున్నారని.. అయితే ఇక్కడ ఎన్నికలకు ముందే ప్రజా కూటమిగా ఏర్పడ్డారని ఆయన ద్వజమెత్తారు.

తెలంగాణలో ప్రజాకూలమి పేరుతో జరుగుతున్న మ్యాచ్ ఫిక్సింగ్‌ రాజకీయాలను తిప్పికొట్టాలని ఆయన పిలుపునిచ్చారు. తెలంగాణలో పార్టీలన్నీ అవినీతిలో కూరుకుపోయాయని, ఎన్నికలయ్యాక అన్నీ ఒక్కటేనని చెప్పారు. ప్రజలను మోసం చేసేందుకు రాహుల్, చంద్రబాబు సభలు పెడుతున్నారని విమర్శించారు. కాంగ్రెస్‌లో తల్లీకొడుకుల రాజ్యం, టీడీపీలో తండ్రీకొడుకుల రాజ్యం నడుస్తోందని ఆయన మండిపడ్డారు. చంద్రబాబు, కేసీఆర్ మధ్య విబేధాలొచ్చినట్టు డ్రామాలు ఆడుతున్నారని ఆయన విమర్శించారు.

ఇక ఎన్నికలు ముగిసిన తరువాత కాంగ్రెస్ కు తన పార్టీ సపోర్టును కేసీఆర్ అందిస్తారని ఆయన సందేహాలు వ్యక్తం చేశారు. అందుకనే యూపీఏ చైర్ పర్సన్ సోనియా గాంధీ కేసీఆర్ ను ఒక్కమాట కూడా అనకుండా ప్రసంగాన్ని కొనసాగించిందని జీవీఎల్ విమర్శించారు. పార్లమెంటు ఎన్నికలలో కాంగ్రెస్, టీఆర్ఎస్ పార్టీల మధ్య రహస్య ఒప్పందం కుదిరిందని జీవీఎల్ అరోపించారు. అందుకనే కేసీఆర్ కూడా సోనియాగాంధీని టార్గెట్ చేసి విమర్శలు గుప్పించడం లేదని అనుమానాలు వ్యక్తం చేశారు.

ఎన్నికలకు ముందు కేసీఆర్-ఓవైసీ బాయ్ బాయ్ గా మారరని, అయితే ఎన్నికలు అయిన తరువాత కేటీఆర్- రాహుల్ గాంధీ విమర్శించారు భాయ్ భాయీగా మారుతారని వీరందరూ ఒకే గూటి పక్షులని ఆయన జోస్యం చెప్పారు. ఈ నిజాన్ని విజ్ఞులైన తెలంగాణ ఓటర్లు గ్రహించాలని జీవీఎల్ కోరారు. టీఆర్ఎస్ పార్టీ గతంలో అన్ని పార్టీలతో పొత్తు పెట్టుకుందని.. వారితో కేసీఆర్, కేటీఆర్ లకు మంచి మైత్రి వుందని కూడా జీవీఎల్ పేర్కోన్నారు. అందరూ కలసి లాలూచీ రాజకీయాలను చేస్తున్నారని ఆయన విమర్శించారు. సరైన ప్రత్యామ్నాయ పార్టీని ఎన్నుకోవాలని ఓటర్లును జీవీఎల్ అభ్యర్థించారు.