భవానీ ద్వీపం రగడకు తెర

Posted: 04/24/2013 07:46 PM IST

భవానీ ద్వీపం ప్రై'వేటు' నుంచి తప్పించుకుంది. ఇక ద్వీపం ఆలనా, పాలనా అంతా ఏపీటీడీసీ అధికారుల చేతుల్లోనే ఉంటుంది. ఇక్కడ అభివృద్ధి కార్యక్రమాలన్నింటినీ ఆ శాఖే చేపట్టనుంది. గతంలో పిలిచిన టెండర్ల ప్రక్రియను రద్దుచేస్తున్నట్టు ప్రభుత్వం స్పష్టం చేసింది. ఈమేరకు రాష్ట్ర ప్రభుత్వం లోకాయుక్తకు నివేదిక సమర్పించడంతో 2011 నవంబరులో హైకోర్టు న్యాయవాది బి.సాయికృష్ణ ఆజాద్‌ దాఖలు చేసిన పిటీషన్‌ను కొట్టి వేస్తూ లోకాయుక్త తీర్పు చెప్పింది. ప్రైవేటీకరణను రద్దు చేయాలని, టెండర్ల ప్రక్రియను నిలిపివేయాలని పిటీషన్‌ లోకాయుక్తను ఆశ్రయించగా ప్రభుత్వం సమర్పించిన నివేదికపై స్పందించిన లోకాయుక్త జస్టీస్‌ సుభాషణ్‌ రెడ్డి పిటీషన్‌ కొట్టి వేస్తూ నిర్ణయం ప్రకటించారు. కోస్తా ప్రాంతంలో ఉన్న పర్యాటక ప్రాంతాలలో భవానీ ద్వీపం అత్యంత అద్భుతమైన ప్రదేశంగా ఉంటుంది. దుర్గా ఘాట్‌ వరకు బోట్‌ సౌకర్యం ఉంది. కృష్ణానదిలో బోటు షికారుకు ప్రజలనుంచి కూడా బాగా ఆదరణ ఉంటుంది. కార్పొరేట్‌ రంగాలకు చెందినపలు వ్యాపార సంస్థలు ఇక్కడ సమావేశాలు, వీకెండ్‌పార్టీలు, నైట్‌ పార్టీలు నిర్వహిస్తుంటాయి. మంచి సౌకర్యవంతమైన గదులు ఉన్నాయి. గదులు తీసుకున్న వారికి ఉదయం అల్పాహారం ఉచితం. ఆర్డర్‌పై భోజనం తయారు చేస్తారు. ప్రస్తుతం రాష్ట్ర టూరిజం డెవలప్‌మెంట్‌ కార్పొరేషన్‌ ఆధ్వర్యంలో నడుస్తున్న భవానీ ద్వీపాన్ని పర్యాటకంగా మరింత అభివృద్ధిచేయడానికి వీలుగా మంత్రి గంటా శ్రీనివాసరావుకు ప్రత్యూష కంపెనీ రూ.290 కోట్లతో అభివృద్ధి చేసేందుకు టెండర్లు కైవసం చేసుకోగా దీనిపై ప్రతిపక్షాలు నానా రాద్ధాంతం చేశాయి.