Posted: 02/23/2013 05:31 PM IST

అజిత్‌సింగ్‌నగర్‌లో శుక్రవారం బాంబ్ కలకలంరేగింది. మాకినేని బసవపున్నయ్య స్టేడియం ఎదురుగా వున్న కూరగాయల దుకాణం వద్ద గుర్తుతెలియని వ్యక్తి క్యారీబాగ్ వదిలివెళ్లాడు. అందులో ఒక స్టీల్ బాక్సుతో పాటు హైదరాబాద్ దిల్‌సుఖ్‌నగర్ చిరునామాతో ఒక ఫైల్ ఉండడంతో స్థానికులు మరింత అందోళన వ్యక్తంచేశారు. క్యారీ బాగు పెట్టి వెళ్లిన వ్యక్తి తిరిగి రాకపోవడంతో దుకాణ యజమాని వెంటనే పోలీసులకు సమాచారం అందజేశారు.  హుటాహుటిన పాయకాపురం సీఐ నాగేశ్వరరావు, ఎస్సై సత్యనారాయణరెడ్డి సిబ్బందితో సంఘటనా స్థలానికి చేరుకున్నారు. సీఐ ఉన్నతాధికారులకు సమాచారం అందజేయడంతో క్యారీ బాగు వద్దకు ఎవరినీ వెళ్లనీయకుండా ట్రాఫిక్‌ను మళ్లించి ప్రజలను దూరంగా పంపించేశారు. కొదిసేపటికి హెడ్‌క్వార్టర్స్ ఏసీపీ సత్యనారాయణ బాంబ్ స్క్వాడ్, క్యూఆర్‌టీ టీంతో అజిత్‌సింగ్‌నగర్‌కు చేరుకున్నారు. బాంబ్ స్క్వాడ్ సిబ్బంది పలు పరీక్షల అనంతరం క్యారీబాగును తెరిచి చూడగా మిగిలిన భోజనం వుండటంతో పోలీసులు ఊపిరిపీల్చుకున్నారు. సింగ్‌నగర్‌లో ఈ బాంబు కలకలం రెండున్నర గంటలపాటు టెన్షన్..టెన్షన్ కలిగించింది. అక్కడంతా తీవ్ర ఉత్కంఠ నెలకుంది. సింగ్‌నగర్ డాబాకొట్లసెంటర్‌లో నుంచి స్టేడియం వైపు వచ్చే వాహనాలను పైపులరోడ్డు నుంచి వచ్చే వాహనాలను సింగ్‌నగర్ లోపలికి అనుమతించకుండా నూజివీడు రహదారి మీదుగానే మళ్లించారు. సంఘటనా స్థలానికి వంద అడుగుల దూరం వరకు ఎవరినీ దగ్గరకు రానీయలేదు. అనుమానిత వ్యక్తుల విషయంలో ప్రజలు అప్రమత్తంగా వుండాలని హెడ్‌క్వార్టర్స్ ఏసీపీ సత్యనారాయణ సూచించారు. అజిత్‌సింగ్‌నగర్‌లో సంఘటన అనంతరం ఆయన విలేకరుతలో మాట్లాడుతూ ఎవరైనా అనుమానాస్పద వ్యక్తులు క్యారీబాగులు, ఇతర వస్తువులు ఏమైనా వదిలివెళితే వెంటనే కంట్రోల్ రూంకు ఫోన్ చేయాలన్నారు. పోలీసులు రాంగ్‌కాల్స్ అనుకుంటారేమోనని అపోహపడి ఎవరూ వెనుకడుగు వేయొద్దని ఎందులో ఏముందో తీసేవరకూ ఎవరికీ తెలిసే అవకాశం లేనందున ప్రజలు అప్రమత్తంగా ఉండి పోలీసులకు సహకరించాలని సత్యనారాయణ కోరారు.