Posted: 02/23/2013 05:40 PM IST

తెలుగుదేశం పార్టీ అధ్యక్షుడు చంద్రబాబు జిల్లా టీడీపీ శ్రేణులకు ఊహించని షాక్ ఇచ్చారు. పెద్దగా ఏమీ మాట్లాడకుండానే పదునైన రెండు, మూడు మాటలతో ఎలా పని చేయాలో కర్తవ్య బోధ చేశారు. జనంతో మమేకం కాకుంటే అంతే సంగతులన్న హెచ్చరికలు చేశారు. జిల్లాలో రెండో విడత పాదయాత్రకు మరో ఐదు రోజులలో రానున్న చంద్రబాబు జిల్లా నాయకులకు హెచ్చరికలు చేయటం గమనార్హం. అధినేత మాటలకు సిగ్గు పడి అయినా తెలుగు తమ్ముళ్ళు ఒళ్ళు వంచి పనిచేస్తారో, లేదో చూడాల్సిందే.  రాష్ట్ర రాజధాని హైదరాబాద్‌లో ఉగ్రవాదులు బాంబు పేలుళ్ళతో విగతజీవులైన వారి బంధువులను, క్షతగాత్రులను ఓదార్చేందుకు, పరిస్థితిని సమీక్షించటానికి శుక్రవారం ఉదయం రాజధాని వెళ్ళిన చంద్రబాబు తిరిగి మధ్యాహ్నం గన్నవరం విమానాశ్రయానికి చేరుకున్నారు. ఈ సందర్భంగా ఆయనను కొందరు స్థానిక మండలపార్టీ నేతలు కలుసుకున్నారు. పాదయాత్రకు ప్రజల నుంచి వస్తున్న స్పందనను ప్రస్తావించారు. ఇదే రీతిన నియోజకవర్గ ఇన్‌చార్జిలు కూడా తమ పరిధిలో పాదయాత్రలు నిర్వహిస్తూ, నిత్యం జనంతోటే ఉంటే పార్టీకి ఎదురుండదు అని చెప్పారు. అప్పటి వరకు ఏమీ మాట్లాడని చంద్రబాబు ద్వితీయ శ్రేణి నాయకుల మాటలతో తన సమక్షంలో ఉన్న టీడీపీ జిల్లా నాయకులకు కర్తవ్యబోధ చేశారు. 'మీరు ఎలా పనిచేయాలో కార్యకర్తలు నిర్దేశిస్తున్నారు. కార్యకర్తల అభిప్రాయం అది. మీరెలా పని చేస్తున్నారో.. మీరే నిర్ణయించుకోండి. కార్యకర్తల అభీష్టానుసారం పని చేయండి. అలా పనిచేస్తే, మీకు పార్టీకి మంచిది అంటూ కర్తవ్య బోధ చేయడంతో నాయకులు కిమ్మనలేదు. మరి ఇకనైనా తెలుగు తమ్ముళ్ళు మేల్కొంటారో, లేదో వేచి చూడాల్సిందే!