Posted: 01/23/2013 04:07 PM IST

తిరుమల శ్రీవారి ఆభరణాల లెక్కింపు ప్రారంభమైంది. ఏటా నిర్వహించే వార్షిక పరిశీలనలో భాగంగా ప్రత్యేక బృందం స్వామివారి నగలను లెక్కిస్తోంది. నెలరోజుల పాటు జరిగే లెక్కింపు అనంతరం  వెంకన్న స్వర్ణాభరణాలను భక్తుల కోసం ప్రత్యేకంగా  ప్రదర్శిస్తారు.తిరుమల శ్రీవారి స్వర్ణాభరణాల వార్షీక పరిశీలన కార్యక్రమం ఆరంభమైంది. స్వామివారి బొక్కసంలోని ఆభరణాలను ఏటా లెక్కించి వాటి వివరాలను రికార్డ్‌ చేస్తారు.అందులో భాగంగానే ఈసారి కూడా వెంకన్న నగలను ఆలయ జేఈవో శ్రీనివాసరాజు నేతృత్వంలోని అధికారుల బృందం పరిశీలిస్తోంది. తిరువాభరణం డాక్యుమెంట్స్ ఆధారంగా నగల విలువ నిర్ధారిస్తున్నారు.

స్వర్ణాభరణాల లెక్కింపు కార్యక్రమాన్ని ప్రారంభించిన టిటిడి ఈవో ఎల్వీ సుబ్రమణ్యం ఆభరణాలను సమగ్రంగా పరిశీలించటానికి నెల పడుతుందన్నారు. ఆలయ ఖజానాలోని ఆభరణాలతో పాటు గత ఏడాదిగా భక్తులు విరాళంగా ఇచ్చిన నగలను కూడా పరిశీలిస్తామన్నారు.ఇంతకీ.... స్వామివారి ఆభరణాలు చూసే భాగ్యం టీటీడీ సిబ్బందికేనా అనుకుంటున్నారా...? కానే కాదు... ఆ అదృష్టం సామాన్య భక్తులకు కూడా దక్కనుంది... శ్రీవారి నగలు లెక్కించిన తర్వాత ... భక్తుల కోసం ప్రదర్శనకు ఉంచుతారు.