రోస్టెడ్ చికెన్ లెమన్ రైస్ తయారీ విధానం

Posted: 08/22/2015 05:30 PM IST

వీకెండ్ లో రెగ్యులర్ గా తినే భోజనం కాకుండా స్పెషల్ గా ఏమైనా తినాలనుకుంటున్నారా..? అయితే రోస్టెడ్ చికెన్ లెమన్ రైస్ తింటే ఎంతో రుచికరంగా వుంటుంది. చిన్నపిల్లల నుంచి పెద్దల వరకు ఎంతో ఇష్టంగా తినే ఈ ఫుడ్ తయారుచేయడం ఎంతో సులభం. మరి.. ఎలా చేస్తారో తెలుసుకుందామా..

కావలసిన పదార్థాలు :
రైస్ - రెండు కప్పులు
బోన్ లెస్ చికెన్ - అరకేజీ
నిమ్మరసం-  నాలుగు స్పూన్లు
పసుపు - అర టీ స్పూన్
కరివేపాకు తరుగు - కాసింత
ఉల్లి తరుగు - అరకప్పు
ఆవాలు - తాలింపుకు తగినంత
పచ్చిమిర్చి ముక్కలు - ఒక స్పూన్
నూనె, ఉప్పు - రుచికి సరిపడా

తయారీ విధానం :
* ముందుగా చికెన్ శుభ్రం చేసుకోవాలి. ఆ తర్వాత దానికి ఉప్పు, పెప్పర్ వేసి బాగా ఉడికించుకోని, రోస్ట్ చేసుకోవాలి.
* ఇప్పుడు స్టౌ మీద పాన్ పెట్టి, అందులో నూనె వేసి వేడి చేయాలి. నూనె కాగిన తర్వాత అందులో కొద్దిగా ఆవాలు వేసి వేయించాలి.
* అందులో పచ్చిమిర్చి కరివేపాకు వేసి ఒక సెకను వేగించుకోవాలి. పోపు వేగిన తర్వాత అందులో ఉల్లిపాయలు ముక్కలు వేసి బ్రౌన్ కలర్ వచ్చే వరకూ వేపుకోవాలి.
* ఇప్పుడు అందులో పెప్పర్ రోస్ట్ చేసిన బోన్ లెస్ చికెన్ వేసి పోపుతోపాటు వేపాలి. పసుపు వేసి మొత్తం మిశ్రమాన్ని కలగలుపుకొని ఫ్రై చేసుకోవాలి.
* మొత్తం ఫ్రై అయిన తర్వాత అందులో ముందుగా వండి పెట్టుకొన్న అన్నం వేసి రుచికి సరిపడా ఉప్పు చిలకరించి మిక్స్ చేయాలి.
* చివరగా ఫ్రైడ్ రైస్ మొత్తం మీద కొద్దిగా నిమ్మరసం చిలకరించి మిక్స్ చేసి మూత పెట్టి మీడియం మంట మీద రెండు మూడు నిముషాలు ఉండనిచ్చి దించేయాలి.
* అంతే రోస్టెడ్ చికెన్‌ రైస్ రెడీ అయినట్లే.