‘‘స్పైసీ ఎగ్ మసాలా కర్రీ’’

Posted: 03/06/2014 04:10 PM IST

గుడ్డు.. ఎంతో శ్రేయస్కరమైన ఆహారపదార్థాలలో ఒకటి. దీనిని తమకు ఇష్టమొచ్చిన విధంగా రకరకాల వంటకాలలో ఉపయోగిస్తారు. ముఖ్యంగా ఎగ్ కర్రీని మన ఇండియాలో అయితే వివిధ పద్ధతుల్లో, ప్రాంతాలవారీగా దీనిని తయారుచేసుకుంటారు. తమ టేస్ట్ కు తగ్గట్టు రుచికరంగా దీనిని చేసుకుంటారు. గుడ్డు మన ఆరోగ్యానికి ఎంతో మేలు చేస్తుంది కూడా. రోజువారీగా రెండు గుడ్లను తీసుకోవడం చాలా మంచిది. 

అలాగే మన హైదరాబాద్ లో ఎగ్ మసాలా ఒక స్పెషల్ వంటకం. దీనిని ఎంతో స్పైసీగా, మంచి ఫ్లెవర్స్ తో తయారుచేస్తారు. ఈ ఎగ్ కర్రీని చేసే పద్ధతిని మనం కూడా తెలుసుకుందాం... 

కావాల్సిన పదార్థాలు :

ఉడికించిన నాలుగు గుడ్లు, రోస్ట్ చేసిన వేరుశెనగ (2 టేబుల్ స్పూన్స్), నువ్వులు (2 టేబుల్ స్పూన్స్), కొబ్బరి తురుము (1 టేబుల్ స్పూన్), జీలకర్ర (1 టేబుల్ స్పూన్), మెంతులు (హాఫ్ టేబుల్ స్పూన్), ఎండు మిర్చి (2), వెల్లుల్లి రెబ్బలు (4), కరివేపాకు, పచ్చిమిర్చి (2), ధనియాలపొడి (1 టేబుల్ స్పూన్), పసుపు (1 టేబుల్ స్పూన్), గరంమసాలా పొడి (1 టేబుల్ స్పూన్), చింతపండు పేస్ట్ (2 టేబుల్ స్పూన్స్), ఉప్పు (సరిపడేంతవరకు), ఆయిల్ (2 టేబుల్ స్పూన్స్), ఒక కప్పులో నీరు 

తయారుచేసే విధానం : 

మొదటగా నాలుగు గుడ్లను బాగా ఉడికించుకోవాలి. తరువాత ఒక పెనుములో ఒక టేబుల్ స్పూన్ పరిమాణంలో ఆయిల్ ను తీసుకొని వేడి చేయాలి. అందులో ఉడికించిన నాలుగు గుడ్లను పొట్టు తీసి అందులో వేయాలి. కొద్దిసేపు మంటమీద పెట్టిన తరువాత పక్కకు తీసేయాలి. 

ఒక మిక్సీ జార్ లో వేరుశెనగ, నువ్వులు, కొబ్బరి తురుము తగిన పరిమాణంలో తీసుకోవాలి. అందులో కొన్ని నీళ్లు పోసి ఒక పేస్ట్ లా తయారు చేసుకోవాలి. 

మొదటలో పక్కన తీసిపెట్టుకున్న పాన్ లో మరికొద్దిగా నూనె పోసి వేడి చేయాలి. తరువాత అందులో తగిన పరిమాణాల్లో జీలకర్ర, మెంతులు, కరివేపాకు, వెల్లుల్లి, పచ్చిమిర్చి వేసి కొద్దిసేపు వేడి చేయాలి. మిక్సీ జార్ లో పేస్ట్ చేసుకున్న మసాలాను పాన్ లో వేసి కొద్దిసేపు వరకు మంటమీద వుంచాలి. 

అలాగే అందులో కొద్దిగా పసుపు, జీలకర్ర, కొత్తిమీర, ఉప్పు వేసి కాసేపు వేడి చేయాలి. చివరికి చింతపండు పేస్ట్ ను ఇందులోకి మిక్స్ చేసి వేడి చేయాలి. 

ఇలా ఈ విధంగా ఎగ్ మసాలా కర్రీని తయారు చేసుకోవచ్చు.