ఆరోగ్యాన్ని మెరుగుపరిచే ఆహారపు అలవాట్లు

Posted: 08/24/2015 03:25 PM IST

ప్రస్తుత ఆధునిక ప్రపంచంలో ప్రతిఒక్కరు పాస్ట్ ఫుడ్, బర్గర్లను రెగ్యులర్ డైట్ లో చేర్చుకుంటుంటారు. ఆఫీసు పనులు, ఇతర కార్యకలాపాల కారణంగా ఇంట్లో ఆరోగ్యకరమైన భోజనం తయారుచేసుకునే సమయం లభించక.. అటువంటి ఆహారాలకు అలవాటు పడతారు. కానీ.. వాటిని తరుచూ తీసుకుంటే ఆరోగ్యపరమైన సమస్యలు తలెత్తుతాయని నిపుణులు హెచ్చరిస్తున్నారు. ఊబకాయం, కొలెస్టిరాల్ పెరిగిపోవడంతోపాటు హార్ట్ ఎటాక్ వంటి సమస్యల్ని ఎదుర్కోవాల్సి వస్తుంది. కాబట్టి.. వాటికి బదులుగా కొన్ని ఆరోగ్యకరమైన ఆహారపు అలవాట్లను నిత్యం పాటిస్తే చాలు.. ఎంతో శ్రేయస్కరమని నిపుణులు సూచిస్తున్నారు. మరి.. అవేమిటో తెలుసుకుందామా..

* సాధారణంగానే బేకరీల్లో తయారు చేసే పదార్థాలు నోరూరిస్తాయి. కానీ వాటివల్ల కొవ్వు పెరుగుతుంది. అలాంటప్పుడు ఇతర తీపి పదార్థాలను కాకుండా.. నాణ్యమైన డార్క్ చాక్లెట్ ఎంచుకోవడం మంచిది. ఎందుకంటే.. అందులో యాంటీ ఆక్సిడెంట్లు పుష్కలంగా వుంటాయి. అవి శరీరానికెంతో మేలు చేస్తాయి.

* నచ్చిన పండ్లూ, కూరగాయలూ ఎంచుకోవడం సరే. వాటితోపాటు రకరకాల రంగుల్లో ఉన్నవాటికీ ప్రాధాన్యం ఇవ్వాలి. అవి కూడా ఆయా కాలాలకు తగిన విధంగా ఎంచుకుంటే మంచిది. అదే సమయంలో ఇంట్లో జీడిపప్పూ, బాదం, గుమ్మడీ, పొద్దుతిరుగుడు గింజలు తప్పనిసరిగా ఉండేలా చూసుకోవాలి. వాటివల్ల శరీరానికి అవసరమయ్యే ప్రొటీన్లూ, ఒమెగా త్రి ఫ్యాటీ ఆమ్లాలూ అందుతాయి. ఇంకో విషయం ఏమిటంటే.. వాటిని నేరుగా తినడం కంటే, సలాడ్లపై వేసుకుంటే మరీ మంచిది.

* శీతలపానీయాలు, రకరకాల జ్యూస్‌లు అంటే చిన్నపిల్లల నుంచి పెద్దలవరకు అందరికీ ఇష్టమే. అయితే వాటిని రెగ్యులర్ గా తాగితే మాత్రం బరువు పెరుగుతారు. ఇతర అనారోగ్యాలూ ఎదురవుతాయి. మరి.. అలాంటప్పుడు ఎలా..? అని ఆలోచించాల్సిన అవసరం లేదు. ఏదైనా జ్యూస్ తాగాలనుకుంటే పండ్ల రసాలను ఇంట్లోనే చేసుకోవాలి. అందులో నిమ్మరసం చేసుకుని తాగతే ఇంకా మంచిది. ఇంట్లో పండ్ల రసాలు చేసుకుంటున్నప్పుడు చక్కెర తక్కువ వేసుకుంటే మంచిదని అంటున్నారు.

* బ్రెడ్, నూడుల్స్ లాంటివి తినడానికి బాగానే ఉంటాయి కానీ వాటికన్నా పొట్టుతీయని గింజలతో చేసిన బ్రెడ్, పాస్తా, ఓట్స్, దంపుడు బియ్యం లాంటివి ఎంచుకోవాలి. వీటిలో పీచు ఎక్కువగా ఉంటుంది. ఇతర పోషకాలూ అందుతాయి.