సకలరోగాలను నివారించే నేరేడు పండు

Posted: 08/25/2015 11:48 AM IST

ప్రస్తుత ఆధునిక యుగంలో వాతావరణ కాలుష్యం తీవ్రంగా పెరిగిపోవడమే కాకుండా.. పోషకాహారాలోపం కారణంగా ప్రతిఒక్కరు రకరకాల రోగాల బారిన పడుతున్నారు. చిన్నపిల్లలు సైతం బీపీ, షుగర్ వంటి వ్యాధులకు గురవుతున్నారు. ఇంతేకాదు.. ఇంకా చిరుజబ్బులు నిత్యం వేధిస్తూనే వుంటాయి. వీటన్ని నుంచి తక్షణమే ఉపశమనం పొంది, ఆరోగ్యంగా వుండాలంటే ప్రత్యేకమైన మందులు వాడాల్సిన అవసరం లేదని నిపుణులు అంటున్నారు. ఆ మందులకు బదులుగా ఆయా కాలాల్లో ప్రకృతి సహజంగా లభించే పళ్ల ద్వారానే నయం చేయవచ్చునని చెబుతున్నారు. అలాంటి పళ్లలో నేరేడుపళ్లు ఎంతో ముఖ్యమైనవి.

అవును.. నేరేడు పళ్లు కేవలం రుచికరంగా వుండటమే కాకుండా ఆరోగ్యాన్ని మెరుగుపరుస్తాయి. ఎందుకంటే.. ఇందులో రకరకాల వ్యాధులకు సంబంధించి వివిధ పోషకాలు పుష్కలంగా వున్నాయి. ముఖ్యంగా నేరేడు పళ్లు మధుమేహ వ్యాధి నివారణకు బాగా ఉపకరిస్తాయి. ఇందులో గ్లైకమిక్ ఇండెక్స్ తక్కువగా ఉండటం వల్ల డయాబెటిస్ వ్యాధికి చక్కగా పనిచేస్తాయి. యాంటీ డయాబెటిక్ ఎఫెక్ట్స్ ఉండే మంచి పండు నేరేడు అని పలు అధ్యయనాల్లో తేలింది కూడా. అంతేకాదు.. ఐరన్, కార్షియం, పొటాషియం, విటమిన్ సి తదితర పోషకాలు పుష్కలంగా ఉండే ఈ పళ్లు తింటే.. వ్యాధి నిరోధక శక్తితోపాటు ఎముకలకు గట్టిదనం కూడా వస్తుంది. చిన్న పిల్లల్లో కనిపించే ఎనీమియా వ్యాధికి మంచి ఔషధం నేరేడు. హిమోగ్లోబిన్ స్థాయిని పెంచడానికి ఉపయోగపడతాయి. నేరేడు పళ్లు తీసుకుంటే డయేరియా వ్యాధి తగ్గుముఖ పండుతుంది. అన్నిటికంటే ముఖ్యంగా నేరేడు పళ్లు క్యాన్సర్ రాకుండా చేయడంలో ముఖ్య పాత్ర వహిస్తాయి.

నేరేడు పళ్లు మాత్రమే కాదు, నేరేడు చెట్టు ఆకులు, బెరడు, విత్తనాలు కూడా ఆరోగ్యానికి మేలు చేస్తాయి. బ్యాక్టీరియా ఇన్‌ఫెక్షన్స్ని తరిమికొట్టడానికి ఉపయోగపడతాయి. నేరేడు చెట్టు ఆకులు తింటే జీర్ణ సంబంధిత సమస్యలు తగ్గుతాయి. ఇన్ని ఔషధగుణాలు కలిగిన ఈ నేరెడు పండును రెగ్యులర్ గా తీసుకుంటే.. నిత్యం ఆరోగ్యంగా మెలగవచ్చునని నిపుణులు సూచిస్తున్నారు.