ఫిరోజ్ మృతి పై సిఎం దిగ్ర్బాంతి

Posted: 10/16/2013 05:35 PM IST

Slain hyderabad soldier feroze khan family fell in grief

పండుగ రోజు తమ ఇంటికి ఆధారమైన పెద్దకొడుకు వస్తాడని ఎదురు చూస్తున్న ఆ కుటుంబానికి అతడి మరణవార్త శరాఘాతంలా తగిలింది. జమ్ము కాశ్మీర్ లో నిన్న పాకిస్థాన్ దళాల కాల్పుల్లో మరణించిన లాన్స్ నాయక్ ఫిరోజ్ ఖాన్ మృతితో హైదరాబాద్ పాతబస్తీలోని నవాబ్ కుంట ప్రాంతంలోగల అతడి ఇంట్లో విషాద ఛాయలు అలముకున్నాయి. కుటుంబానికి పెద్దదిక్కు అతడే కావడంతో కుటుంబ సభ్యులంతా కన్నీరు మున్నీరయ్యారు. బక్రీద్ పర్వదినాన ఈ కుటుంబంలో ఆనందానికి బదులు విషాదం అలముకుంది. రెండు రోజుల క్రితమే ఫిరోజ్ ఖాన్ ఇంటికి ఫోన్ బక్రీద్ పండక్కి పిల్లలకు కొత్త దుస్తులు కొనమని చెప్పినట్లు కుటుంబ సభ్యులు తెలిపారు.

పండుగనాడు ఫిరోజ్ ఖాన్ వస్తాడని అందరూ ఎదురు చూశామని, తీరా అతడి మరణవార్త రావడంతో అంతా పరేషాన్ అయ్యామని అతడి సమీపం బంధువు ఒకరు చెప్పారు. ఫిరోజ్ ఖాన్ కు ముగ్గురు పిల్లలున్నారు. ఆ కుటుంబంలో ఇంకా ముగ్గురికి పెళ్లి చేయాల్సిన బాధ్యత కూడా అతడి మీదే ఉంది. నిన్న రాత్రి రెండు గంటలకు తమకు మొదటి సమాచారం వచ్చిందని, అప్పుడు కూడా బుల్లెట్ తగిలింది తప్ప ఏమీ కాలేదన్నారని, తీరా నిజం చెప్పమని గట్టిగా అడిగితే తర్వాత ఆర్మీలోని ఉన్నతాధికారి ఒకరు ఫోన్ చేసి ఫిరోజ్ ఖాన్ మరణించినట్లు చెప్పారని అతడి బంధువులు తెలిపారు. దీంతో వృద్ధురాలైన తల్లిని పట్టుకోవడం తమ తరం కావట్లేదని వాపోయారు. జమ్ము కాశ్మీర్ లోని పూంఛ్ జిల్లా మెంధార్ లోని హమీర్ పూర్ ప్రాంతంలో పాక్ దళాలు ప్రయోగించిన మోర్టార్ స్ప్లింటర్ తగిలి ఫిరోజ్ ఖాన్ మరణించిన విషయం తెలిసిందే.

సిఎం దిగ్ర్బాంది

జమ్మూకాశ్మీర్ లో జరిగిన కాల్పుల్లో జవాను ఫిరోజ్ ఖాన్ మృతి పై ముఖ్యమంత్రి కిరణ్ కుమార్ రెడ్డి దిగ్ర్బాంతి వ్యక్తం చేశారు. ఫిరోజ్ ఖాన్ కుటుంబసభ్యులకు ముఖ్యమంత్రి సంతాపం తెలిపారు. రాత్రి 9 గంటలకు ఫిరోజ్ ఖాన్ బౌతిక కాయం హైదరాబాద్ చేరుకోనున్నట్లు సమాచారం.