తెలంగాణ మంత్రులతో సిఎం భేటీ?

Posted: 08/03/2013 12:54 PM IST

రాష్ర్ట ముఖ్యంత్రి నల్లారి కిరణ్ కుమార్ రెడ్డి ఎట్టకేలకు మౌనం విడారు. ఢిల్లీ నుంచి వచ్చిన తరువాత ముఖ్యమంత్రి కిరణ్ కుమార్ రెడ్డి తెలంగాణ ప్రాంత నేతలతో భేటీ అవుతున్నారు. సీమాంధ్ర మంత్రులు, కాంగ్రెస్‌ ఎమ్మెల్యేలు కొందరు రాజీనామాల బాట పడుతున్న నేపథ్యంలో కిరణ్ కుమార్ రెడ్డిగా అండగా తాము ఉంటామని తెలంగాణ ప్రాంత మంత్రులు, ఎమ్మెల్యేలు, ఎమ్మెల్సీలు చెబుతున్నారు. సీమాంధ్రలో నెలకొన్న ఉద్రిక్త పరిస్థితులను చక్కదిద్దేందుకు ప్రయత్నిస్తున్న సీఎంకు తాము తమదైన పద్ధతిలో సహకరిస్తామని వారు చెబుతున్నారు. రాష్ట్ర విభజన నేపథ్యంలో నెలకొన్న తాజా పరిణమాలపై తెలంగాణ ప్రాంత ప్రజా ప్రతినిధులు ఈరోజు ఉదయం ముఖ్యమంత్రితో భేటీ అయ్యారు. సీఎం క్యాంప్ కార్యాలయంలో జరిగిన ఈ సమావేశంలో ఏడుగురు తెలంగాణ మంత్రులు, కేంద్రమంత్రితోపాటు నలుగురు ఎంపీలు, పలువురు ఎమ్మెల్యేలు, ఎమ్మెల్సీలు పాల్గొన్నారు. అసెంబ్లీలో తెలంగాణ తీర్మానం ఆమోదం పొందేలా చూడాలని వారు ఈ సందర్భంగా ముఖ్యమంత్రిని కోరారు. సీమాంధ్రకు రాజధాని నిర్మాణం, వనరుల పంపిణీ వంటి అంశాల్లో తాము సహకరిస్తామని వారు కిరణ్ కు తెలిపారు. మరోవైపు రాష్ట్రంలో నెలకొన్న రాజకీయ ఉద్రిక్త పరిస్థితులను చక్కదిద్దడంపై ముఖ్యమంత్రి దృష్టి సారించారు. ఇటు తెలంగాణ నేతలో భేటీ అయిన ఆయన అటు సీమాంధ్ర ప్రాంతాల కాంగ్రెస్‌ ఎమ్మెల్యేలు, ఎమ్మెల్సీలతో సాయంత్రం సమావేశం కానున్నారు. రాష్ట్ర విభజనపై ప్రజలు తీవ్రస్థాయిలో నిరసనలు తెలుపుతుండడంతో వాటికి తట్టుకోలేక రాజీనామాల బాట పడుతున్న సీమాంధ్ర కాంగ్రెస్‌ ఎమ్మెల్యేలు, ఎమ్మెల్సీలు సంయమనం పాటించాలంటూ కిరణ్‌ మరోమారు సూచించబోతున్నారు. సీమాంధ్రలో నెలకొన్న పరిస్థితులను సమీక్షించి తీసుకోవాల్సిన చర్యలపై చర్చించేందుకు ఆ ప్రాంత కాంగ్రెస్‌ ఎమ్మెల్యేలు, ఎమ్మెల్సీలతో సమావేశమవుతారు.