విడగొట్టలేదు :ఢిఎస్

Posted: 08/01/2013 09:01 AM IST

తెలుగు ప్రజలను విడతీసేందుకు కాంగ్రెస్‌ పార్టీ ఒడిగట్టిందని జరుగుతున్న ప్రచారం సరికాదని కాంగ్రెస్‌ పార్టీ సీనియర్‌ నాయకుడు డి.శ్రీనివాస్‌ స్పష్టం చేశారు. పరిపాలన సౌలభ్యం కోసమే రాష్ట్రాన్ని పార్టీ రెండు భాగాలుగా చేసిందని శ్రీనివాస్‌ వెల్లడించారు. ఢిల్లీలో జరిగిన సమావేశంలో ఆయన ప్రసంగించారు. రాజకీయ లబ్ధికోసం పార్టీ ఇంతటి ఘాతుకానికి పాల్ప డిందనే అసత్యపు ప్రచారాన్ని ప్రజలు విశ్వసించవద్దని డిఎస్‌ విద్యార్థులకు విజ్ఞప్తి చేశారు. కొన్ని అసమానతలు తొలగించేందుకు పరిపాలనా పరంగా కొన్ని మార్పులు అవసరమని కాంగ్రెస్‌ పార్టీ భావించిందని శ్రీనివాస్‌ పేర్కొన్నారు. ప్రకటనకు ముందు పార్టీ అనేక కోణాలలో పరిష్కారం కోసం ప్రయత్నించిందని, గత్యంతరం లేక తుదకు నిర్ణయం తీసుకో వాల్సి వచ్చిందని డిఎస్‌ అన్నారు. హైదరాబాదులో నివశించే సీమాంధ్రులను సెటిలర్స్‌గా అభివర్ణించడం సరికాదని ఆయన హతవు పలికారు. భారతీయు లైనవారు ఎవరైనా, ఎక్కడైనా జీవించే హక్కును రాజ్యాంగం కల్పించిందని తెలియచేశారు. వారికి భద్రత కల్పించడం ప్రభుత్వం బాధ్యత అని అందుకు అవసరమైన చట్టాలను కూడా చేస్తామని డిఎస్‌ హామీ ఇచ్చారు. రాష్ట్రం విడిపోతుందని బాధతో ప్రజలు విధ్వంసాలకు దిగవద్దని హతవు పలికారు. రాష్ట్రం విడతీసి వేరే రాష్ట్రంలో కలిపినట్లయితే తెలుగువారందరూ సంఘటితంగా ఆందోళనలు చేయాలికాని, ఒకే భాష మాట్లాడే మన సోదరులు తమకు అన్యాయం జరిగిందంటూ రోడ్డెక్కవద్దని ఆవేదన వ్యక్తం చేశారు. సీమాంధ్రకు చెందిన ఎంపీలు రాజీనామాకు పాల్పడేముందు మరో మారు ఆలోచించాలని ఆయన సూచిం చారు. కాంగ్రెస్‌ పార్టీ రాష్ట్రాన్ని తప్పనిసరి పరిస్థితిలోనే విడతీసేందుకు ప్రయత్నించిందన్నారు.