Posted: 02/12/2013 06:52 PM IST

 

       పెళ్లిళ్ల సందడికి నగరం సిద్ధమవుతోంది. మరో రెండు నెలల వరకూ మంచి ముహూర్తాలు లేకపోవడంతో 13,14, 15 తేదీల్లోనే 50 వేల ఇళ్లలో పెళ్లి బాజాలు మోగనున్నాయి. ఈ వేడుకల్లో హంగూఆర్భాటాల కోసమే పెద్దమొత్తంలో ఖర్చుకానుంది. ఇటీవలి కాలంలో నగరంలో ఒక్కో పెళ్లికి 5 లక్షల నుంచి 35 లక్షల రూపాయల వరకూ ఖర్చు చేస్తున్నారు. తాజాగా భారీ స్థాయిలో జరుగుతున్న వివాహాలు పెళ్లి ఖర్చుపై మరోసారి చర్చకు తెరలేపాయి. ఒకేసారి పెళ్లి సంబరాలు రావటంతో ఈవెంట్ మేనేజర్ల నుంచి వివాహ వేడుకలో భాగమైన ప్రతి ఒక్కరూ బిజీ అయిపోయారు. పురోహితులకైతే ఎక్కడా లేని డిమాండ్ వచ్చింది. నగరంలో దాదాపు 50 వేల పెళ్లిళ్లు జరుగుతుంటే అందుకు తగిన సంఖ్యలో పురోహితులు లేకపోవటంతో ఒక్కరే మూడు నాలుగు పెళ్లిళ్లు చేయడానికి సిద్ధమయ్యారు.
       పురోహితులు మాత్రమే కాదు... క్యాటరింగ్, ఫ్లవర్ డెకరేటర్స్, బ్యాండ్‌మేళం... ఇలా అందరూ ఈ మూడు రోజులూ ఫుల్ బిజీ. ఎన్నడూ లేనంత డిమాండ్ ఉన్నప్పటికీ వీలైనంత మందికి సేవలందించటానికే ప్రయత్నిస్తున్నామంటున్నారు. ఈసారి పెళ్లిళ్లలో ఆడంబరాలు మరికాస్త పెరిగాయి. దాంతోపాటే ఖర్చూ పెరిగింది. నగరంలో ఓ పెళ్లి మండపం కోసం చేస్తోన్న కనీస ఖర్చు 40వేల రూపాయలు. ఇక థీమ్ పెళ్లిళ్లకైతే అదనపు ఖర్చు తోడవుతుంది. లిల్లీయం, తులిప్స్, ఆర్చిడ్స్.. ఇలా అన్నీ ఇంపోర్టెడ్ ఫ్లవర్స్‌తో మండపం డెకరేట్ చేయాలనుకుంటుండటం... డిమాండ్‌కు తగిన సప్లయ్ లేకపోవటంతో వీటి ధరలు రెండు రెట్లయ్యాయి.కేవలం డెకరేషన్, ఫుడ్, ఫోటోగ్రఫీ కోసం 5 కోట్ల రూపాయలు ఖర్చు చేస్తోన్న శ్రీమంతులు నగరంలో పెరిగారు. ఇక వివాహ సమయంలో విందుకైతే కనీసం 250 రూపాయలకు తక్కువ చెల్లిస్తున్న వాళ్లు లేనే లేరు. ఇంపోర్టెడ్ ఫ్రూట్స్, ఆల్మండ్స్ లాంటి వాటితో వండి వడ్డిస్తే ప్లేట్ 1200రూపాయలకు పైగానే ఉంటుందిమరీ. సొమ్ముండాలికాని హడావుడికి అంతేముందంటారూ..

...avnk