Posted: 02/06/2013 12:15 PM IST

       అబలలమీద అమానుషాలు మితిమీరి పోవటంతో మహిళలపై లైంగిక నేరాల నిరోధానికి కేంద్ర ప్రభుత్వం నిర్దిష్ట కార్యాచరణ ప్రణాళికను ప్రకటించింది. దీని అమలును పర్యవేక్షించే బాధ్యతను ఏడు కీలక మంత్రిత్వ శాఖల కార్యదర్శులకు అప్పగించింది. వీరు కేబినెట్ కార్యదర్శి, ప్రధాని కార్యాలయానికి వ్యక్తిగతంగా నెలవారీ నివేదికలు సమర్పించాల్సి ఉంటుంది. తాజా ప్రణాళిక ప్రకారం... దేశంలో తొలుత ప్రయోగాత్మకంగా 100 జిల్లాల్లోని ఎంపిక చేసిన ఆస్పత్రులలో బాధితులకు సాంత్వన కలిగించేందుకు 'తక్షణ ప్రతిస్పందన కేంద్రాలు' ఏర్పాటవుతాయి. అలాగే వారికి పరిహారం అందించే ప్రత్యేక పథకాన్ని మహిళా, శిశు సంక్షేమశాఖ అమలు చేస్తుంది.
       అత్యవసర పరిస్థితి నిర్వహణ వ్యవస్థను ఏర్పాటు చేసి 911 లేదా 990 నంబరు కేటాయించే అంశం పరిశీలనలో ఉంది. దీనికి ఫోన్ చేశాక బాధితుల వేదనను స్వీకరించాల్సిందే తప్ప మరో నంబరుకు చేయమనడం అనే మాటే ఉండదు. అంతేకాకుండా ప్రత్యేకించి మహిళల కోసమే 181 నంబరు ఏర్పాటు చేసే అవకాశం కూడా ఉంది. నేర ప్రదేశంతో సంబంధం లేకుండా ఎక్కడైనా ఫిర్యాదు స్వీకరించేలా పోలీస్ స్టేషన్లకు సరిహద్దులు తొలగిస్తారు. మహిళలపై వేధింపులతోపాటు తీవ్రమైన నేరాలపై ఎఫ్ఐఆర్ నమోదు చేసి, తర్వాత సంబంధిత స్టేషన్‌కు బదిలీ చేస్తారు. ఈ మేరకు కేంద్ర మంత్రిమండలి కార్యదర్శి అజిత్ సేథ్ నిర్వహించిన అనేక సమావేశాల అనంతరం ప్రభుత్వం పలు నిర్ణయాలు తీసుకుంది. ముందుగా పోలీసు, పాలన వ్యవస్థలను పటిష్ఠం చేస్తారు. మోటారు వాహనాల చట్టాన్ని సమీక్షిస్తారు. మహిళల కోసం ప్రత్యేక బస్సులను, టాక్సీలను త్వరలోనే ప్రవేశపెట్టనున్నారు. వీటిని సాధ్యమైనంత మేర మహిళలే నడిపేలా చూస్తారు. చట్టాల అమలు వ్యవస్థల జవాబుదారీతనాన్ని పెంచుతారు. ముఖ్యంగా దురుసుగా వ్యవహరించడం, గద్దించి ప్రశ్నించడం, సాక్ష్యమివ్వాలని బెదిరించడం వంటి వేధింపులకు తావు లేకుండా పౌరులెవరైనా ధైర్యంగా ఫిర్యాదు చేసేలా రక్షణ కల్పిస్తారు. జాతీయ నేర గణాంక నమోదు సంస్థ దోషులకు సంబంధించిన "నేర వివరాల సంకలనం'' నిర్వహిస్తూ వెబ్‌సైట్‌లో ఉంచబోతున్నారు.

...avnk