Posted: 12/15/2012 02:58 PM IST

     భాగ్యనగర వాసులకు బడ్జెట్ తయారైపోయింది.  2013-14 ఆర్థిక సంవత్సరానికి మహానగర పాలక సంస్థ కోసం అధికారులు రూపొందించిన బడ్జెట్‌కు స్టాండింగ్ కమిటీ గ్రీన్ సిగ్నల్ ఇచ్చింది. మేయర్ మహ్మద్ మాజిద్ హుస్సేన్ అధ్యక్షతన జరిగిన స్టాండింగ్ కమిటీ సమావేశంలో కాంగ్రెస్, మజ్లిస్ కార్పొరేటర్లు బడ్జెట్ ప్రతిపాదనలను ఏక గ్రీవంగా ఆమోదించారు. అధికారులు ప్రతిపాదించిన రూ. 3700 కోట్లకు అదనంగా మరో రూ. 100 కోట్లను చేర్చి గ్రేటర్ బడ్జెట్‌ను రూ. 3800 కోట్లుగా ప్రకటించారు.
       సమావేశంలో కాంగ్రెస్ కార్పొరేటర్లు ఎస్సీ,ఎస్టీ నిధులను ఎక్కడ ఖర్చు పెడుతున్నారో చెప్పాలని అధికారులను కోరారు. మూడేళ్లుగా బడ్జెట్‌లో కేటాయింపులే లేవని గుర్తు చేశారు. దీనిపై స్పందించిన మేయర్ మాజిద్ ఎస్సీ, ఎస్టీలకు అవసరమైన చోట నిధులు ఖర్చు చేయడానికి పక్కా ప్రణాళికతో అధికారులు త్వరలో స్టాండింగ్ కమిటీ ముందుకొస్తారన్నారు. అలాగే వాళ్ల కోసం నిధులు ఖర్చు చేయడానికి ఎటువంటి అభ్యంతరం లేదని ప్రకటించారు. మేయర్ హామీతో కాంగ్రెస్ కార్పొరేటర్లు సంతృప్తి చెందారు.
       ఆ తరువాత 2012-13 కోసం సవరించిన రూ. 2664 కోట్ల బడ్జెట్‌ను కమిటీ ఆమోదించింది. బడ్జెట్‌లోని అంశాలను మేయర్ మాజీద్, కమిషనర్ కృష్ణబాబులు కలిసి మీడియాకు వివరించారు.

...avnk