పేరుకు తగ్గట్టే గ్రేటర్ బడ్జెట్ ‘పెద్ద’ అంకెలతో రూపొందింది. అటు ఎంసీహెచ్ చరిత్రలోను, ఇటు జీహెచ్‌ఎంసీ ఏర్పాటయ్యాక అతి పెద్ద బడ్జెట్ ఇదే కానుంది. దీని రూపకల్పనలో మజ్లిస్ మార్కు ప్రస్ఫుటమైంది. వాస్తవిక బడ్జెట్ అంటూ జీహెచ్‌ఎంసీ అధికారులు తీవ్ర కసరత్తు అనంతరం దాదాపు రూ.2935 కోట్లతో రూపొందించిన ముసాయిదా బడ్జెట్‌ను అమాంతంగా రూ. 600 కోట్లకు పైగా పెంచేశారు. వెరసి రూ.3600 కోట్లతో ముసాయిదా బడ్జెట్ తాజాగా సిద్ధమైంది. దీనిపై చర్చించేందుకు బుధవారం స్టాండింగ్ కమిటీ ముందుంచారు. సమావేశంలో ఎలాంటి వ్యతిరేకత వ్యక్తం కాలేదు. వచ్చేవారం జరిగే స్టాండింగ్ కమిటీ సమావేశ ం దీనికి ఆమోదముద్ర వేయడం లాంఛనమే. అనంతరం జీహెచ్‌ఎంసీ జనరల్ కౌన్సిల్‌లో ఆమోదం తెలిపి, ప్రభుత్వానికి నివేదిస్తారు.పంతం నెగ్గించుకున్న మజ్లిస్
2011-12 ఆర్థిక సంవత్సరానికి కేటాయించిన రూ.3321 కోట్ల బడ్జెట్‌నే అమలు చేయలేక సవరణలు చేసి తగ్గించుకున్న జీహెచ్‌ఎంసీ.. 2012-13 కాలానికి ఏకంగా రూ.3600 కోట్లతో ‘మహా’ బడ్జెట్‌ను రూపొందించింది. కాంగ్రెస్ మేయర్ ఉన్నప్పుడు గత నవంబర్‌లో వాస్తవిక బడ్జెట్‌ను రూపొందిస్తున్నామని ప్రకటించి మూడువేల కోట్లకు చేరకుండా జాగ్రత్తపడ్డారు. అప్పట్లోనే దీనికి స్టాండింగ్ కమిటీ ఆమోదముద్ర పడాల్సి ఉన్నా.. కమిటీ ముందుకు అది రాకుండా చేయడంలో ఎంఐఎం సఫలీకృతమైంది. తమ పార్టీ మేయర్ వచ్చాకే కొత్త బడ్జెట్‌కు మోక్షమని కొందరు ఎంఐఎం కార్పొరేటర్లు అన్నట్టే.. ఎంఐఎం అంచనాలకనుగుణంగా అధికారులు ముసాయిదాను తిరగరాయక తప్పలేదు. ఇది వాస్తవిక బడ్జెట్ అని మేయర్ మహ్మద్ మాజిద్ హుస్సేన్ వ్యాఖ్యానించారు. ఆస్తిపన్ను వసూళ్ల పెంపు చర్యలు, వివిధ రూపాల్లో ప్రభుత్వం నుంచి వచ్చే వాటా ధన ం పెరగనుండటం వల్ల ఆదాయం పెరగనుందని, అందుకనుగుణంగానే తాజా బడ్జెట్‌ను రూపొందించామన్నారు.ఆస్తిపన్ను డిమాండ్‌ను భారీగా పెంచడంతో ఆ మేరకు వసూళ్లు కాగలవా అనే సందేహాల్ని కొందరు కాంగ్రెస్ సభ్యులు వ్యక్తం చేసినట్లు సమాచారం.

వ్యయం (అంచనా రూ.కోట్లలో)
పేదల ఇళ్ల నిర్మాణం- 550
రోడ్ల విస్తరణ- 175
వంతెనలు, ఫుట్‌ఓవర్‌బ్రిడ్జిలు- 150
ప్రధాన, చిన్న రోడ్ల నిర్వహణ- 135
నాలాల నిర్మాణం, మరమ్మతులు- 135
చెరువుల సంరక్షణ, నీళ్లు, డ్రైనేజీ- 70
ఆఫీసు భవనాల నిర్మాణం- 50
శివార్లలో నీటి సరఫరా- 40
కొత్త పార్కులు- 40
రోడ్ల తవ్వకాలు, పూడ్చివేతలు- 30
మలేరియా నిర్మూలన, ఎన్నికలు -25
వీధిదీపాల నిర్వహణ- 17
క్రీడా పరికరాలు- 4
ఎక్స్‌గ్రేషియాల మొత్తం- 3 కోట్లు
(ఒక్కొక్కరికిచ్చే ఎక్స్‌గ్రేషియా
మొత్తం రూ.లక్షకు పెంపు)

ఆదాయం (అంచనా రూ.కోట్లలో)
ఆస్తిపన్ను వసూళ్లు- 720
జీహెచ్‌డీపీ అమలుకు రుణం- 250
వృత్తిపన్ను -230
భవన నిర్మాణ అనుమతులు- 160
బెటర్‌మెంట్ చార్జీలు- 80
బిల్డింగ్ డెవలప్‌మెంట్ చార్జీలు- 75
మోటారు వాహన పన్ను- 60
ఎల్‌ఆర్‌ఎస్ -50
ప్రకటన, హోర్డింగ్‌ల ఫీజు- 35
గార్బేజి చార్జీలు- 12