బాహుబలిని టెన్షన్ పెడుతున్న అవతార్

Posted: 04/16/2016 05:12 PM IST

తెలుగు సినీ ఇండస్ట్రీ ఖ్యాతిని ప్రపంచ వ్యాప్తంగా తెలియజేసిన దర్శకుడు ఎస్.ఎస్.రాజమౌళి దర్శకత్వంలో రూపొందిన ‘బాహుబలి’ చిత్రానికి సీక్వెల్ గా ‘బాహుబలి2’ చిత్రం తెరకెక్కుతున్న విషయం తెలిసిందే. యంగ్ రెబల్ స్టార్ ప్రభాస్, రానా, రమ్యకృష్ణ, అనుష్క, తమన్నా, సత్యరాజ్, నాజర్ ప్రధాన పాత్రలలో నటిస్తున్న ఈ చిత్ర షూటింగ్ ప్రస్తుతం శరవేగంగా సాగుతోంది.

‘బాహుబలి2’ చిత్రాన్ని వచ్చే ఏడాది ఏప్రిల్ నెలల విడుదల చేయడానికి ఈ చిత్ర యూనిట్ ప్రకటించిన విషయం తెలిసిందే. అయితే ప్రస్తుతం ‘బాహుబలి2’ చిత్ర యూనిట్ కు ‘అవతార్’ టెన్షన్ పట్టుకుందట. ప్రముఖ హాలీవుడ్ డైరెక్టర్ జేమ్స్ కామెరూన్ దర్శకత్వలో రూపొందిన విజువల్ వండర్ ‘అవతార్’ చిత్రానికి సీక్వెల్ గా ‘అవతార్’ పార్ట్ 2 రూపొందనుంది. ‘అవతార్’ చిత్రానికి సీక్వెల్ గా నాలుగు పార్ట్ లు రాబోతున్నాయని దర్శకుడు జేమ్స్ కామెరూన్ తాజాగా ప్రకటించాడు.

2018లో మొదటి భాగం, 2020లో రెండవ భాగం, 2022లో మూడవ భాగం, 2023లో నాలుగవ భాగాలను విడుదల చేయాలనుకుంటున్నట్లుగా జేమ్స్ కామెరూన్ స్పష్టం చేసారు. అయితే ‘బాహుబలి’ చిత్రాన్ని కూడా రెండు, మూడు పార్ట్ లుగా రూపొందించడానికి సన్నాహాలు చేస్తున్నట్లుగా దర్శకుడు రాజమౌళి మరియు చిత్ర రచయిత విజయేంద్ర ప్రసాద్ ప్రకటించిన విషయం తెలిసిందే.

ఇపుడు ‘అవతార్’ సీక్వెల్ ల వలన ‘బాహుబలి’ సీక్వెల్ కు గట్టి పోటీ ఏర్పడిందని చెప్పుకోవచ్చు. ‘అవతార్’ చిత్రం విజువల్స్, గ్రాఫిక్స్ అంశాలతో రూపొందనుంది. ‘బాహుబలి’ చిత్రం కమర్షియల్, ఎమోషనల్ భారీ యాక్షన్ ఎంటర్ టైనర్ గా రూపొందనుంది. ‘అవతార్’ తర్వాత ‘బాహుబలి’ చిత్రం విడుదలైతే కలెక్షన్ల పరంగా ఇబ్బందులు తప్పవని ‘బాహుబలి’ చిత్ర యూనిట్ భావిస్తున్నట్లుగా తెలుస్తోంది.