మెగాస్టార్ కోసం కోలీవుడ్ స్టార్ హీరోయిన్ ఫిక్స్?

Posted: 03/15/2016 01:12 PM IST

మెగాస్టార్ చిరంజీవి 150వ సినిమా ఎప్పుడూ ప్రారంభమవుతుందోనని మెగా అభిమానులు ఎంతగానో ఎదురుచూస్తున్నారు. తమిళంలో ఘనవిజయం సాధించిన ‘కత్తి’ చిత్రాన్ని తెలుగులో చిరు 150వ చిత్రంగా రీమేక్ చేయనున్నారు. ఈ సినిమాకు వి.వి.వినాయక్ దర్శకత్వం వహించనున్నాడు. అయితే ఈ ప్రాజెక్ట్ మాత్రం గతకొద్ది కాలంగా ముందుకు వెళ్లడమే లేదు. ఏదో ఒక కారణంతో ఈ ప్రాజెక్ట్ సెట్స్ పైకి వెళ్లకుండా ఆగిపోతుంది.

ఇప్పటికే ఈ చిత్ర స్ర్కిప్ట్ వర్క్ పూర్తయ్యాయని, ప్రీ ప్రొడక్షన్ కార్యక్రమాలు కూడా చివరి దశకు చేరుకున్నట్లుగా తెలుస్తోంది. ఇదిలా వుంటే.. చిరంజీవి సరసన హీరోయిన్ గా ఎవరు నటించనున్నారు అనే అంశం టాలీవుడ్ లో హాట్ టాపిక్ గా మారింది. ఇప్పుడున్న స్టార్ అగ్ర హీరోయిన్లు అందరితో చిరంజీవి నటించారు. కానీ... అనుష్క, నయనతారలతో చిరంజీవి నటించలేదు.

‘స్టాలిన్’ సినిమాలో స్పెషల్ సాంగ్ లో అనుష్కతో చిరంజీవి స్టెప్పులేసాడు. అయితే ఈ 150వ సినిమాలో ముందుగా అనుష్కను హీరోయిన్ గా అనుకున్నప్పటికీ... ‘బాహుబలి2’ సినిమాతో బిజీగా వుండటంతో చిరు సినిమాకు అనుష్క నో చెప్పేసింది. ఇక నయనతారను ఫైనలైజ్ చేసారు చిత్ర యూనిట్. ఇప్పుడున్న స్టార్, అగ్ర హీరోలందరితో నయనతార జతకట్టింది. చిరంజీవితో నయనతార నటించడం ఇదే తొలిసారి.

అయితే ఇటీవలే ఈ ప్రాజెక్టుకు నయనతార గ్రీన్ సిగ్నల్ ఇచ్చిందని, మే నెలలో ఈ సినిమా కోసం నయనతార డేట్స్ ఇచ్చినట్లుగా తెలిసింది. దీంతో ఇక షూటింగ్ ప్రారంభించేయాలని చిత్ర దర్శక,నిర్మాతలు భావిస్తున్నారు. ఏప్రిల్ నెలలో షూటింగ్ ప్రారంభించడానికి సన్నాహాలు చేస్తున్నారు. ఈ చిత్రాన్ని రాంచరణ్ తన సొంత బ్యానర్ పై నిర్మించనున్నారు. త్వరలోనే అన్ని వివరాలను అధికారికంగా ప్రకటించనున్నారు.