‘జనతా గ్యారేజ్’ దర్శకుడికి ఎన్టీఆర్ ఖరీదైన గిఫ్ట్

Posted: 02/24/2016 12:17 PM IST

ఒకప్పుడు బ్లాక్ బస్టర్ హిట్ చిత్రాలకు రచయితగా పనిచేసిన కొరటాల శివ ఇటీవలే ‘మిర్చి’ సినిమాతో దర్శకుడిగా మారిన విషయం తెలిసిందే. దర్శకుడిగా తొలిసినిమాతోనే భారీ విజయాన్ని అందుకున్నాడు. ప్రభాస్ హీరోగా నటించిన ‘మిర్చి’ చిత్రం భారీ విజయం సాధించడమే కాకుండా, ప్రభాస్ సినీ కెరీర్లో ఓ మంచి స్థానాన్ని సొంతం చేసుకుంది. ఈ సినిమా తర్వాత మహేష్ తో ‘శ్రీమంతుడు’ అనే చిత్రాన్ని తీసాడు కొరటాల శివ.

ఈ సినిమా విడుదలై కలెక్షన్ల మోత మోగించింది. ‘శ్రీమంతుడు’ చిత్రం భారీ విజయం సాధించి, కలెక్షన్ల వర్షం కురింపించడంతో... మహేష్ సంతోషంతో దర్శకుడు కొరటాల శివకు 50లక్షలు విలువ చేసే ఆడిఏ6 కారును బహుమతిగా ఇచ్చాడు. ‘మిర్చి’, ‘శ్రీమంతుడు’ వంటి రెండు వరుస బ్లాక్ బస్టర్ హిట్ చిత్రాలను తీసిన కొరటాల శివ దర్శకత్వంలో రాబోతున్న మూడవ చిత్రం ‘జనతా గ్యారేజ్’.

యంగ్ టైగర్ ఎన్టీఆర్ హీరోగా కొరటాల శివ దర్శకత్వంలో రూపొందుతున్న ఈ చిత్రాన్ని మైత్రీ మూవీస్ సంస్థ భారీ బడ్జెట్ తో నిర్మిస్తుంది. అయితే ఎన్టీఆర్ కు కొత్తరకం వాచ్(watches)లు అంటే ఇష్టం. ఎవరైనా తన సన్నిహితులు, ఫ్రెండ్స్ కు ఎక్కువగా వాచ్ లను గిఫ్ట్ గా ఇస్తుంటాడు. ‘జనతా గ్యారేజ్’ కోసం కొరటాల శివ ఓ అద్భుతమైన స్ర్కిప్టును సిద్ధం చేసాడు. ఆ కథ నచ్చడంతో కొరటాల శివకు ఎన్టీఆర్ ఓ ఖరీదైన బహుమతిని అందజేసినట్లుగా తెలిసింది.

తాజా సమాచారం ప్రకారం... దాదాపు 20 లక్షలు విలువ చేసే వాచ్ ను కొరటాల శివకు ఎన్టీఆర్ బహుమతిగా ఇచ్చాడని తెలిసింది. కేవలం స్ర్కిప్ట్ నచ్చడం వల్లనే ఇంత భారీ గిఫ్ట్ ఇస్తే... ఇక సినిమా విడుదలై ఘన విజయం సాధిస్తే దర్శకుడికి ఎన్టీఆర్ ఎలాంటి బహుమతిని అందజేస్తాడో చూడాలి. అలాగే ‘జనతా గ్యారేజ్’ కోసం కొరటాల శివ దాదాపు 10కోట్ల రెమ్యునరేషన్ తీసుకుంటున్నట్లుగా తెలిసింది.

‘మిర్చి’ చిత్రానికి 50 లక్షలు, ‘శ్రీమంతుడు’ చిత్రానికి 4 కోట్లు రెమ్యునరేషన్ తీసుకోగా... ‘జనతా గ్యారేజ్’ కోసం ఏకంగా 10కోట్ల రెమ్యునరేషన్ తీసుకుండటంతో.. కొరటాల శివ రేంజు ఏ స్థాయిలో పెరిగిపోయిందో అర్థం అవుతోంది. ఇటీవలే ఈ చిత్ర షూటింగ్ లాంఛనంగా ప్రారంభమయ్యింది. దేవిశ్రీప్రసాద్ సంగీతం అందిస్తున్నాడు.