వీరిద్దరి సినిమాలకు థియేటర్ల రచ్చ

Posted: 01/11/2016 12:15 PM IST

Theaters war between nannaku prematho and dictator

ఒక కుటుంబం అభిమానులను ప్రస్తుతం ఇద్దరు వ్యక్తులు, రెండు సినిమాలు వేరు చేయబోతున్నట్లుగా కనబడుతోంది. నందమూరి కుటుంబానికి చెందిన నందమూరి బాలకృష్ణ మరియు నందమూరి తారకరామారావు(జూ.ఎన్టీఆర్). నందమూరి తారల సినిమా విడుదలవుతుందంటే నందమూరి అభిమానుల్లో ఎంతో ఉత్సాహం ఏర్పడుతుంది. సినిమా విజయంలో నందమూరి అభిమానులదే కీలకం అని చెప్పుకోవచ్చు. కానీ ఈసారి మాత్రం నందమూరి అభిమానులు రెండు వర్గాలుగా విడిపోయే పరిస్థితి ఏర్పడింది. దీనికి గల కారణం ‘డిక్టేటర్’ మరియు ‘నాన్నకు ప్రేమతో’ చిత్రాలు.

ఎన్టీఆర్ నటించిన ‘నాన్నకు ప్రేమతో’ చిత్రం ఈనెల 13న సంక్రాంతి కానుకగా ప్రపంచ వ్యాప్తంగా విడుదల కానుంది. ఆ మరుసటి రోజున అంటే జనవరి 14న సంక్రాంతి కానుకగా బాలయ్య నటించిన ‘డిక్టేటర్’ చిత్రం భారీ ఎత్తున ప్రపంచ వ్యాప్తంగా విడుదల కానుంది. దీంతో నందమూరి అభిమానులతో పాటు తెలుగు సినీ ఇండస్ట్రీలో పెద్ద ఉత్కంఠ మొదలయ్యింది. రాజకీయ ఎలక్షన్ల సమయంలో కూడా ఇంత ఉత్కంఠ వుంటుందో లేదో తెలియదు కానీ.. ఇప్పుడు మాత్రం రాజకీయ పరంగా, సినిమా పరంగా, అభిమానుల్లో భారీ ఉత్కంఠ మొదలయ్యింది.

ఇరు చిత్రాలు కూడా ఓ వారం రోజుల వాయిదా వేసుకొని విడుదల చేసినా కూడా మంచి కలెక్షన్లు రాబట్టే అవకాశం వుంది. కానీ అలా కాకుండా ఒకే రోజు తేడాతో రెండు సినిమాలు విడుదలవుతుండటంతో ఎన్టీఆర్ కు కాస్త నష్టం జరిగే అవకాశాలు కనిపిస్తున్నట్లుగా సినీవర్గాల అంచనా. ఇప్పటికే ‘డిక్టేటర్’ సినిమా ఆంధ్రాలోని చాలా థియేటర్లను సొంతం చేసుకున్నట్లుగా తెలిసింది. ‘డిక్టేటర్’ కంటే ముందుగా ‘నాన్నకు ప్రేమతో’ చిత్రం విడుదలవుంది కాబట్టి.. ఆ ఒక్క రోజున ఆంద్రాలోని దాదాపు అన్ని థియేటర్లలో ‘నాన్నకు ప్రేమతో’ చిత్రం విడుదల కానుంది.

జనవరి 14న మాత్రం అందులో 75శాతం థియేటర్లలో ‘నాన్నకు ప్రేమతో’ సినిమాను తీసేసి, ‘డిక్టేటర్’ సినిమాను ప్రదర్శించే విధంగా ప్రయత్నాలు జరుగుతున్నట్లుగా తెలిసింది. అసలే బాలయ్యకు భారీ క్రేజ్ వుండటం, అదే విధంగా రాజకీయపరంగా మంచి సపోర్ట్ వుండటంతో ‘నాన్నకు ప్రేమతో’ చిత్రానికి థియేటర్ల కరువు ఏర్పడే అవకాశాలు కనిపిస్తున్నాయి.

మొత్తానికి ‘డిక్టేటర్’ విడుదల వల్ల ‘నాన్నకు ప్రేమతో’ చిత్రానికి థియేటర్ల కరువు ఏర్పడటం ఖాయమని సినీ వర్గాల అంచనా. ఇక 15వ తేదిన విడుదల కావాల్సిన నాగార్జున ‘సొగ్గాడే చిన్ని నాయనా’ చిత్రం థియేటర్ల కరువు కారణంగా సినిమా విడుదలను వాయిదా వేసే ఆలోచనలో వున్నారు. భారీ సంఖ్యలో థియేటర్లు దొరికాకే ‘సొగ్గాడే చిన్ని నాయనా’ చిత్రం విడుదల కానుంది. మరి ‘డిక్టేటర్’ దెబ్బకు ‘నాన్నకు ప్రేమతో’ చిత్రం ఎలాంటి విజయం సాధించనుందో మరికొద్ది రోజుల్లోనే తెలియనుంది.