కాజల్ పాలిట అమైరా విలన్...?

Posted: 10/01/2015 06:33 PM IST

Amyra dastur grab kajal agarwals chance ram charan thani oruvan remake tollywood gossips

పంజాబి భామ కాజల్ అగర్వాల్ కి కాలం అంతగా కలిసి రావడం లేదనిపిస్తోంది. నిన్నటిదాకా తెలుగు చిత్రపరిశ్రమలో స్టార్ హీరోయిన్ గా చెలామణి అవుతూ వరుస ఆఫర్లు చేజిక్కించుకన్న ఈ అమ్మడికి.. ఇప్పుడు కొద్దోగొప్పో మాత్రమే అవకాశాలు వస్తున్నాయి. మహేష్ బాబు ‘బ్రహ్మోత్సవం’ మినహా తెలుగులో ఏ ఇతర సినిమాలు చేయట్లేదు. ఆఫర్లు రాక తన కెరీర్ ఎక్కడ గాడిలో పడుతుందోనని ఆందోళనలో మునిగివున్న కాజల్ కి.. ఇప్పుడు నటి అమైరా దస్తూర్ రూపంలో మరిన్ని కష్టాలు వచ్చినట్లు వార్తలొస్తున్నాయి. ప్రస్తుతం ఇండస్ట్రీలో ఇదే హాట్ టాపిక్ గా మారింది. ఇంతకీ అమైరా వల్ల కాజల్ కి వచ్చిన నష్టమేంటి? అని అనుకుంటున్నారా! ఆ వివరాలు తెలియాలంటే మేటర్ లోకి వెళ్లాల్సిందే!

తమిళంలో భారీ విజయం సాధించిన ‘తని ఒరువన్’ చిత్రాన్ని తెలుగులో రీమేక్ చేస్తున్న విషయం తెలిసిందే! రామ్ చరణ్ కథానాయకుడిగా నటిస్తున్న ఈ చిత్రానికి సంబంధించి అప్పుడే అవసరమైన కార్యక్రమాలు చకచకా జరిగిపోతున్నాయి. ఇప్పటికే ప్రీ-ప్రొడక్షన్ కార్యక్రమాలు మొదలుపెట్టిన ఈ చిత్రం యూనిట్.. హీరోయిన్ ఎంపిక విషయంలో వేగంగా పావులు కదుపుతున్నట్టు తెలుస్తోంది. నిజానికి ఈ సినిమాలో హీరోయిన్ గా కాజల్ అగర్వాల్ ని సంప్రదిస్తున్నారంటూ ఇటీవల ప్రచారం జోరుగా సాగింది. చెర్రీ-కాజల్ కాంబోలో వచ్చిన చిత్రాలు ఘనవిజయం సాధించడంతో.. ఈసారి కూడా కాజల్ ని తీసుకుంటే సక్సెస్ సెంటిమెంట్ కలిసొస్తుందని యూనిట్ భావించి, ఆమెను తీసుకోవాలని అనుకున్నందట. అయితే.. ఇంతలోనే ఏమయ్యిందో తెలీదు కానీ.. చెర్రీ సరసన కథానాయికగా ‘అమైరా దస్తూర్’ని ఎంపిక చేసినట్లు టాక్ వినిపిస్తోంది. బాలీవుడ్ లో ‘ఇస్సక్’ సినిమాతో ఎంట్రీ ఇచ్చిన ఈ భామ.. తమిళంలో ధనుష్ సరసన ‘అనేగన్’ చిత్రంలో, ఇమ్రాన్ సరసన ‘మిస్టర్ ఎక్స్’ సినిమాలోనూ కథానాయికగా నటించింది. ఆ చిత్రాలు అంతగా విజయం సాధించకపోయినా.. నటిగా అమైరాకు మంచి మార్కులే వచ్చి పడ్డాయి. ఈ నేపథ్యంలో ఈమెని హీరోయిన్ గా తీసుకోవాలని యూనిట్ నిర్ణయించినట్లు తెలుస్తోంది. దీంతో.. కాజల్ కి వరించాల్సిన ఆఫర్ ఈ అమ్మడు ఎగరేసుకుపోయిందని అనుకుంటున్నారు.

అయితే.. ఇక్కడో చిన్న క్లారిటీ ఇంకా రావాల్సి వుంది. అదేమిటంటే.. కాజల్ ని కాదనుకుని అమైరాను సినిమాలో తీసుకున్నారా? లేక కాజల్ మాత్రమే కాకుండా రెండో కథానాయికగా ఈ కొత్త భామను ఎంపిక చేసుకున్నారా? అనే విషయమై సందేహాలు చక్కర్లు కొడుతున్నాయి. నిజానికి తమిళ్ రియల్ వెర్షన్ లో నయనతార ఒకతే హీరోయిన్ గా నటించింది. రెండు హీరోయిన్ ఆ సినిమాలో లేదు. కానీ.. తెలుగులో అందుకు భిన్నంగా ఇద్దరు హీరోయిన్లను తీసుకుంటున్నారేమోనన్న అనుమానాలు రేకెత్తుతున్నాయి. అదీ కాకపోతే.. అమైరాను ప్రత్యేక పాత్ర కోసం ఎంపిక చేశారా? అని పుకార్లు షికార్లు కొడుతున్నాయి. ఈ మొత్తం ప్రశ్నలకు ఫుల్ స్టాప్ పడాలంటే.. అధికారిక ప్రకటన వచ్చే వరకు వెయిట్ చేయాల్సిందే! ఇదిలావుండగా.. ఎస్వీ ప్రసాద్ - డీవీవీ దానయ్య సంయుక్తంగా నిర్మించనున్న ఈ చిత్రానికి సురేందర్ రెడ్డి దర్శకత్వం వహించే అవకాశం వుందని టాక్ వినిపిస్తోంది.