పవర్ స్టార్ చేతుల మీదుగా అఖిల్ ఆడియో?

Posted: 09/15/2015 05:28 PM IST

Pawan kalyan to launch akhil movie audio release

కమర్షియల్ మాస్ చిత్రాల దర్శకుడు వి.వి.వినాయక్ దర్శకత్వంలో అక్కినేని అఖిల్ హీరోగా నటిస్తున్న తాజా చిత్రం ‘అఖిల్’. ‘పవర్ ఆఫ్ జువా’ ట్యాగ్ లైన్. అన్నపూర్ణ స్టూడియోస్ సమర్పణలో శ్రేష్ట్ మూవీస్ బ్యానర్ పై హీరో నితిన్ భారీ బడ్జెట్ తో నిర్మిస్తున్నాడు. సయేశా సైగల్ హీరోయిన్. అనూప్, థమన్ సంగీతం అందిస్తున్నారు.

ఇప్పటికే విడుదలైన ఈ చిత్ర ఫస్ట్ లుక్ పోస్టర్లకు భారీ రెస్పాన్స్ వచ్చింది. ఈ చిత్ర ఆడియోను సెప్టెంబర్ 20న అక్కినేని నాగేశ్వరరావు జయంతి సందర్భంగా విడుదల చేయనున్నారు. ఈ ఆడియో వేడుకకు పవర్ స్టార్ పవన్ కళ్యాణ్ ముఖ్య అతిథిగా విచ్చేయనున్నారని సమాచారం.

గతంలో నితిన్ నటించిన పలు చిత్రాల ఆడియో వేడుకకు పవన్ కళ్యాణ్ ముఖ్య అతిథిగా విచ్చేసారు. అంతేకాకుండా నితిన్ పై పవన్ కళ్యాణ్ కు మంచి సన్నిహిత్యం వుంది. ఈ సన్నిహిత్యంతోనే పవన్ కళ్యాణ్ ను నితిన్ ‘అఖిల్’ ఆడియోకు ఆహ్వానించినట్లుగా తెలిసింది. పవన్ కూడా ఈ వేడుకకు రావడానికి గ్రీన్ సిగ్నల్ ఇచ్చినట్లుగా సమాచారం.

ఇటీవలే ఆస్ట్రియా షెడ్యూల్ పూర్తి చేసుకొచ్చారు ‘అఖిల్’ చిత్ర యూనిట్. ఈ చిత్రాన్ని అక్టోబర్ 21న గ్రాండ్ గా ప్రపంచ వ్యాప్తంగా విడుదల చేయనున్నారు. మరి ఈ సినిమాకు సంబంధించిన మరిన్ని వివరాలు త్వరలోనే అధికారికంగా ప్రకటించనున్నారు.