శ్రీమంతుడుగా మారనున్న సల్మాన్ ఖాన్?

Posted: 09/08/2015 01:02 PM IST

కొరటాల శివ దర్శకత్వంలో మహేష్ బాబు హీరోగా రూపొందిన ‘శ్రీమంతుడు’ చిత్రం ఇటీవలే విడుదలై అందరి ప్రశంసలు అందుకుంటూ హౌస్ ఫుల్ కలెక్షన్లతో దూసుకుపోతున్న విషయం తెలిసిందే. శృతిహాసన్ హీరోయిన్ గా నటించిన ఈ చిత్రంలో జగపతిబాబు, రాజేంద్రప్రసాద్ కీలక పాత్రలలో నటించారు. దేవిశ్రీప్రసాద్ అద్భుతమైన సంగీతాన్ని అందించారు.

ధనవంతులు ఏదైనా ఊరిని దత్తత తీసుకొని బాగుచేసుకుంటే.. ఈ దేశం బాగుపడుతుందనే మంచి మెసేజ్ తో రూపొందిన ఈ చిత్రంపై ప్రేక్షకులతో పాటు సినీ, రాజకీయ ప్రముఖులు సైతం ప్రశంసలు కురిపిస్తున్నారు. ‘శ్రీమంతుడు’ చిత్రాన్ని ఆదర్శంగా తీసుకొని ఇప్పటికే కొంతమంది కొన్ని ఊర్లను దత్తత తీసుకున్నారు.

అయితే ఈ చిత్రాన్ని హిందీలోకి రీమేక్ చేయడానికి సల్మాన్ ఖాన్ ప్రయత్నిస్తున్నట్లుగా తెలిసింది. గతంలో మహేష్ నటించిన ‘పొకిరి’ చిత్రాన్ని హిందీలో సల్మాన్ ఖాన్ ‘వాంటెడ్’ పేరుతో రీమేక్ చేసారు. హిందీలో ఈ చిత్రం ఘనవిజయం సాధించింది. అయితే ఇపుడు ‘శ్రీమంతుడు’పై కన్నేసాడు సల్మాన్.

ఈ సినిమాను హిందీలో తానే రీమేక్ చేయడానికి సల్మాన్ ప్రయత్నిస్తున్నట్లుగా తెలిసిందే. సల్మాన్ స్వీయ నిర్మాణంలో రూపొందనున్న ఈ ప్రాజెక్టుకు సంబంధించి అన్ని వివరాలు త్వరలోనే అధికారికంగా తెలియనున్నాయి.