నాగ్ సినిమాలో అనుష్క స్పెషల్ గెస్ట్?

Posted: 08/10/2015 04:01 PM IST

కింగ్ అక్కినేని నాగార్జున, తమిళ స్టార్ కార్తీ, మిల్కీ బ్యూటీ తమన్నా ప్రధాన పాత్రలలో తాజాగా ఓ మల్టీస్టారర్ చిత్రం తెరకెక్కుతున్న విషయం తెలిసిందే. ఈ చిత్రానికి ‘దోస్త్’ అనే టైటిల్ ను పరిశీలిస్తున్నాడు. ‘ఎవడు’ వంటి భారీ బ్లాక్ బస్టర్ హిట్ చిత్రం తర్వాత ప్రముఖ దర్శకుడు వంశీ పైడిపల్లి దర్శకత్వంలో తెరకెక్కుతున్న ఈ చిత్రాన్ని పి.వి.పి పతాకంపై ప్రముఖ నిర్మాత ప్రసాద్. వి. పోట్లూరి భారీ బడ్జెట్ తో నిర్మిస్తున్నారు.

ప్రస్తుతం ఈ చిత్ర షూటింగ్ లండన్ లో శరవేగంగా జరుగుతోంది. ఇందులో కార్తీ సరసన తమన్నా హీరోయిన్ గా నటిస్తుంది. అయితే నాగార్జునకు జోడిగా సౌత్ ఆఫ్రికన్ మోడల్ గాబ్రియేల్ల దిమెత్రియాడెన్ నటిస్తుంది. ఇప్పటికే వీరిద్దరిపై కొన్ని కీలక సన్నివేశాలను చిత్రీకరించారు.

అయితే తాజా సమాచారం ప్రకారం ఈ సినిమాలో స్టార్ హీరోయిన్ అనుష్క కూడా ఓ కీలక పాత్రలో నటించనుందని తెలిసింది. స్పెషల్ గెస్ట్ అప్పియరెన్స్ పాత్రలో అనుష్క నటించనుందని, కథలో ఓ ట్విస్ట్ ను తీసుకొచ్చే కీలక సన్నివేశంలో అనుష్క నటించనుందని తెలిసింది. త్వరలోనే షూటింగ్ లో అనుష్క కూడా పాల్గొననుందని సమాచారం.

త్వరలోనే ఈ చిత్రానికి సంబంధించిన అన్ని వివరాలు కూడా చిత్ర యూనిట్ అధికారికంగా ప్రకటించనున్నారు. భారీ బడ్జెట్ తో తెలుగు, తమిళం భాషలలో రూపొందుతున్న ఈ చిత్రాన్ని ఏకకాలంలో రెండు భాషలలో విడుదల చేయనున్నారు. ఈ చిత్రానికి గోపిసుందర్ సంగీతం అందిస్తున్నారు.