రాస్కెల్ పై కన్నేసిన విక్టరీ వెంకటేష్

Posted: 06/17/2015 10:41 AM IST

టాలీవుడ్ అగ్ర స్టార్ హీరో విక్టరీ వెంకటేష్ ఇప్పటి వరకు చాలా రీమేక్ చిత్రాల్లో నటించారు. దాదాపు ఆ రీమేక్ చిత్రాలన్నీ కూడా మంచి విజయం సాధించాయి. ఇటీవలే మలయాళంలో మోహన్ లాల్ నటించిన ‘దృశ్యం’ చిత్రాన్ని తెలుగులో అదే పేరుతో వెంకటేష్ రీమేక్ చేసారు. ఈ సినిమా తెలుగులో కూడా విజయం సాధించింది. అయితే ఇపుడు మరో మలయాళ చిత్రాన్ని రీమేక్ చేయడానికి వెంకీ ప్రయత్నాలు సాగిస్తున్నారు.

మలయాళంలో మమ్ముట్టి, నయనతార ప్రధాన పాత్రలలో నటించిన ‘భాస్కర్ ది రాస్కెల్’ అనే చిత్రం ఇటీవలే విడుదలై మంచి విజయాన్ని సాధించింది. అయితే ఈ చిత్రాన్ని తెలుగులో రీమేక్ చేయడానికి ప్రముఖ అగ్రనిర్మాత సురేష్ బాబు ప్రయత్నిస్తున్నారు. తాజా సమాచారం ప్రకారం ఈ చిత్ర తెలుగు రీమేక్ హక్కులను సురేష్ బాబు సొంతం చేసుకున్నట్లుగా తెలిసింది.

ఈ చిత్రాన్ని తెలుగులో వెంకటేష్ తో తీయనున్నారు. అయితే వెంకీ పక్కన హీరోయిన్ గా నయనతారను ఎంపిక చేయాలని సురేష్ బాబు ప్రయత్నిస్తున్నారు. గతంలో వీరిద్దరి కాంబినేషన్లో వచ్చిన ‘తులసి’ చిత్రం మంచి విజయాన్ని సొంతం చేసుకుంది. ఇందులో వీరి కెమిస్ట్రీ కూడా బాగా సరిపోయింది. అందుకే ఈ రీమేక్ లో కూడా నయనతారను ఎంపిక చేయాలని నిర్మాత ప్రయత్నిస్తున్నట్లుగా తెలిసింది.

ప్రస్తుతం ఈ చిత్ర స్ర్కిప్ట్ పనులు శరవేగంగా జరుగుతున్నట్లుగా తెలిసింది. ఇంకా ఈ చిత్ర నటీనటులు, సాంకేతిక నిపుణుల వివరాలు త్వరలోనే తెలియనున్నాయి. త్వరలోనే అన్ని వివరాలు అధికారికంగా తెలియనున్నాయి.