నందమూరి కళ్యాణ్ రామ్ తో దిల్ రాజు చిత్రం

Posted: 04/29/2015 03:31 PM IST

Kalyan ram next movie in dil raju banner

2015 సంవత్సరం అంతా కూడా ‘నందమూరి నామసంవత్సరం’ కాబోతుందంటూ ఎన్టీఆర్, కళ్యాణ్ రామ్ లు ప్రకటించి... ‘పటాస్’, ‘టెంపర్’ సినిమాలను బ్లాక్ బస్టర్ హిట్లుగా వారి ఖాతాలో వేసుకున్న విషయం తెలిసిందే. ‘పటాస్’ సినిమా హిట్టుతో స్వాగతం చెప్పిన హీరో కళ్యాణ్ రామ్ ఫుల్ జోష్ లో వున్నాడు. ఈ సినిమా ఘనవిజయం సాధించడంతో తన తర్వాత చిత్రాన్ని చాలా జాగ్రత్తగా ప్లాన్ చేసుకుంటున్నాడు కళ్యాణ్ రామ్.

తాజా సమాచారం ప్రకారం కళ్యాణ్ రామ్ హీరోగా ప్రముఖ నిర్మాత దిల్ రాజు ఓ చిత్రాన్ని నిర్మించబోతున్నట్లుగా తెలిసింది. ఇటీవలే ‘పిల్లా నువ్వులేని జీవితం’ సినిమాతో విజయాన్ని అందుకున్న దర్శకుడు ఎఎస్ రవికుమార్ చౌదరి ఈ చిత్రానికి దర్శకత్వం వహించనున్నాడని తెలిసింది.

ప్రస్తుతం కళ్యాణ్ రామ్ కోసం రవికుమార్ చౌదరి ఓ పవర్ ఫుల్ యాక్షన్ ఎంటర్ టైనర్ కథను సిద్ధం చేస్తున్నట్లుగా తెలిసింది. రవికుమార్ చౌదరి తీసిన ‘పిల్లా నువ్వులేని జీవితం’ చిత్రానికి దిల్ రాజు నిర్మాతగా వ్యవహరించారు. అలాగే కళ్యాణ్ రామ్ నటించిన ‘పటాస్’ చిత్రాన్ని నైజాం ఏరియాలో దిల్ రాజు డిస్ట్రిబ్యూట్ చేసారు.

అందుకే దిల్ రాజు వీరిద్దరితో కలిసి ఓ సినిమా ప్లాన్ చేస్తున్నట్లుగా తెలిసింది. త్వరలోనే ఇందుకు సంబంధించిన అన్ని వివరాలు అధికారికంగా ప్రకటించనున్నాడు. ప్రస్తుతం కళ్యాణ్ రామ్ నటిస్తున్న ‘షేర్’ సినిమా విడుదలకు సిద్ధమవుతోంది. అలాగే కళ్యాణ్ రామ్ నిర్మిస్తున్న ‘కిక్2’ సినిమా త్వరలోనే ప్రేక్షకుల ముందుకు రానుంది.