పవన్ - చెర్రీ సినిమాకు తోడైన మాటల మాంత్రికుడు!

Posted: 03/05/2015 12:15 PM IST

మెగాపవర్ స్టార్ రామ్ చరణ్ హీరోగా ఓ సినిమా తెరకెక్కిస్తానని ఇటీవలే పవన్ కల్యాణ్ ప్రకటించిన విషయం తెలిసిందే! పవన్ కళ్యాణ్ క్రియేటివ్ వర్క్స్ పతాకంపై ఈ సినిమాను రూపొందించనున్నారు. ఇక పవన్ నిర్మాణ సంస్థ ఇప్పటికే ‘సర్దార్’ అనే టైటిల్ ని ఫిల్మ్ ఛాంబర్ లో రిజిస్టర్ చేయించింది కానీ.. ఆ టైటిల్ చెర్రీ సినిమా కోసమా..? లేక పవన్ మూవీ కోసమా..? అన్న విషయం ఇంకా తెలియరాలేదు. ఇదిలావుండగా.. పవన్-చెర్రీ కాంబోలో రూపొందే సినిమాకు దర్శకుడు త్రివిక్రమ్ శ్రీనివాస్ దర్శకత్వం వహిస్తారని ఇండస్ట్రీలో ప్రచారం జరుగుతుంది.

గతంలో తనకు త్రివిక్రమ్ దర్శకత్వంలో ఓ మూవీలో నటించాలనే కోరికను రామ్ చరణ్ వెల్లడించిన విషయం తెలిసిందే! పైగా పవన్ – త్రివిక్రమ్ అత్యంత సన్నిహితులు అనే విషయం విదితమే! ఈ నేపథ్యంలో బాబాయి నిర్మించే తొలి సినిమాకు త్రివిక్రమ్ దర్శకుడు అయితేనే బాగుంటుందని చరణ్ సూచించారట! చెర్రీ ఇచ్చిన ఆ సూచన మేరకే పవన్ తాను నిర్మిస్తున్న చిత్రానికి దర్శకత్వం వహించాల్సిందిగా త్రివిక్రమ్ ని కోరినట్లు తెలుస్తోంది. దీంతో స్వయంగా పవనే తనకు ఇంత మంచి ఆఫర్ ఇస్తున్నందుకు మాటల మాంత్రికుడు వెంటనే ఓకే చేశాడని అంటున్నారు.

నిజానికి చరణ్ తో సినిమా చేయాలని త్రివిక్రమ్ గతంలోనే భావించినప్పటికీ.. అది సాధ్యపడలేదు. అయితే.. ఇప్పుడు ఆ ఆఫర్ వెతుక్కుంటూ ఇతనికే వరించడంతో హ్యాపీగా ఫీల్ అవుతున్నట్లు సన్నిహితవర్గాలు తెలుపుతున్నాయి. పవన్ నిర్మాత, త్రివిక్రమ్ దర్శకుడు, రామ్ చరణ్ హీరో.. ఈ కాంబినేషన్ సినీ అభిమానులతోపాటు ఇండస్ట్రీ వర్గాలలో ఆసక్తి రేపుతుంది. అయితే.. వీరి మూవీకి త్రివిక్రమ్ దర్శకత్వం వహిస్తున్నట్లుగా ఊహాగానాలే వస్తున్నాయిగానీ.. ఇంకా అధికారిక ప్రకటన వెలువడి కాలేదు.