నిప్పులేనిదే పొగ.., కాపి కొట్టందే కేసు ఉండవు

Posted: 12/06/2014 01:43 PM IST

Rajinikanth lingaa movie story latest case

దేవుడి పేరుతో సినిమా తీస్తే ఆయన ఆశీర్వాదం ఉంటుందనుకున్న రజినికి అంతా రివర్స్ అవుతోంది. భారీ బడ్జెట్ తో తెరకెక్కిన లింగా సినిమా ఇబ్బందులు ఎదుర్కుంటోంది. గతంలో ఈ మూవీ కథ తనదే అని ఓ వ్యక్తి కోర్టులో పిటిషన్ దాఖలు చేయగా.., విచారించిన కోర్టు కేసును కొట్టేసింది. గొడవ ముగిసింది అనుకునేలోపు మరో కేసు పడింది. ఈ సారి కూడా ‘లింగా’ కథను రవికుమార్ కాపి కొట్టాడు అని కేసు దాఖలయింది. రచయత శక్తివేల్ కోర్టులో పిటిషన్ దాఖలు చేశాడు. దీంతో సినిమా మళ్లీ వివాదంలో పడింది.

పిటిషన్ వివరాల ప్రకారం. ‘ముళ్ళై పెరియార్’ డ్యాం నేపథ్యంగా తాను ఓ కథ రాసుకుని దాన్ని 2012 సంవత్సరంలో నిర్మాతల మండలిలో రిజిస్టర్ చేయించానని చెప్పాడు. పలువురు హీరోలు, ప్రొడ్యూసర్లకు చెప్పినా.., భారీ బడ్జెట్ పెట్టలేము అని చెప్పటంతో సైలెంట్ అయ్యానన్నారు. ఇంతలోనే రవికుమార్ తన కథతో సినిమా తీశారని ఆరోపించారు. తన అనుమతి లేకుండా వాడుకుని తీసిన సినిమా విడుదల కాకుండా అడ్డుకోవాలని కోర్టులో పిటిషన్ దాఖలు చేశాడు. ఈ పిటిషన్ పరిశీలించిన కోర్టు డైరెక్టర్ రవికుమార్, నిర్మాత రాక్ లైన్ వెంకటేష్ కు నోటిసులు పంపింది.

సినిమా విడుదలకు ముందు ఇలా ఇబ్బందులు ఎదురుకావటంపై అభిమానులు ఆందోళన వ్యక్తం చేస్తున్నారు. అయితే వరుసగా కేసులు పడుతుండటంతో రవికుమార్ సొంతంగా రాసుకున్నాడా., లేక కాపి కొట్టాడా అని అనుమానాలు వస్తున్నాయి. ఒకవేళ కథ తీసుకోవాలనుకుంటే వారిని పిలిచి డబ్బులు ఇచ్చి తీసుకునేవాడు కానీ ఇలా వివాదాలు తెచ్చుకునే స్వభావం ఆయనది కాదు అని కోలీవుడ్ వర్గాలు అంటున్నాయి. ‘కత్తి’ సహా ఇతర సినిమాల కథలపై కూడా ఇలాగే వివాదాలు వచ్చాయి. మరి ఈ మూవీ కేసుల గొడవ ఎటు వెళ్తుందో కోర్టు తేల్చనుంది.

కార్తిక్