హమ్మయ్యా.. చివరకు రజనీకి ఊరట లభించింది!

Posted: 12/03/2014 09:25 PM IST

Rajnikanth linga movie story copy allegations court dismissed case

తమనుతాము ప్రచారం చేసుకోవడం కోసమో లేక ఇతరులను డామినేట్ చేయడం కోసమో తెలీదుగానీ.. ఈమధ్య కొంతమంది దర్శకనిర్మాతలు తమ సినిమాలను కాపీ కొడుతున్నారంటూ పెద్ద సినిమాలపై ఇండస్ట్రీలో తెగ ఫిర్యాదులు ఇచ్చేస్తున్నారు. ముఖ్యంగా తెలుగు, తమిళ ఇండస్ట్రీలో అయితే ఇటువంటి వివాదాలు ఇప్పటికే ఎన్నో చోటుచేసుకున్నాయి.. ఇంకా జరుగుతూనే వున్నాయి కూడా! ఈమధ్యకాలంలో టాలీవుడ్’లో ఆ సమస్యలు కాస్త తగ్గుముఖం పట్టాయికానీ.. తమిళంలో మాత్రం ఇంకా పెరిగిపోతున్నట్లు తెలుస్తోంది. బడాహీరోలను టార్గెట్ చేసుకుని వారి సినిమాల విడుదలకు ముందు కాపీ కొట్టారంటూ కంప్లైంట్లు చేస్తున్నారు. ఇక ఈ జాబితాలో రజనీ ‘లింగ’ కూడా చేరిపోయిన విషయం తెలిసిందే!

తమిళ సూపర్’స్టార్ హీరోగా కేఎస్ రవికుమార్ దర్శకత్వంలో రూపొందిన ‘లింగ’ చిత్రం విడుదలకు సిద్ధమవుతోంది. రజనీ జన్మదిన వేడుకల సందర్భంగా గ్రాండ్’గా చిత్రాన్ని విడుదల చేసేందుకు అన్ని ఏర్పాట్లు ఎప్పటినుంచో సిద్ధం చేసుకున్నారు. అయితే ఇంతలోనే దర్శకుడు రవికుమార్ తమ కథను కాపీ కొట్టి ‘లింగ’ చిత్రాన్ని తీశాడంటూ ఓ దర్శకనిర్మాత కోర్టుకెక్కాడు. దీంతో ఆ మూవీ టీమ్ ఆందోళనల్లో మునిగిపోయింది. విడుదలకు అన్ని ఏర్పాట్లు సిద్ధం చేసుకోగా.. కాపీ వివాదం వల్ల ఎక్కడ ఆగిపోతుందోనని యూనిట్ వర్గాలతోపాటు రజనీ అభిమానులు, చిత్రాన్ని భారీరేటుకు కొనుగోలు చేసిన డిస్ట్రిబ్యూటర్లు తెగ టెన్షన్ పడిపోయారు.

ఇదిలావుండగా.. ఈ విషయమై విచారణ చేపట్టిన కోర్టు ఆ సినిమాపై వున్న ‘కాపీ’ ఆరోపణలను కొట్టిపారేసింది. ‘లింగ’ కథ కాపీ కొట్టింది కాదని తేల్చి పారేసింది. దీంతో ఆ చిత్రం టీమ్ ఊపిరి పీల్చుకున్నారు. ముందుగా అనుకున్నట్లుగానే రజనీ పుట్టినరోజు డిసెంబర్ 12న ఏ అడ్డంకులు లేకుండా విడుదలకు సిద్ధమవుతోంది. ఇందులో అనుష్క శెట్టి, సొనాక్షి సిన్హా కథనాయికలుగా నటిస్తున్నారు. భారీ బడ్జెట్టుతో నిర్మించిన ఈ చిత్రాన్ని ప్రపంచవ్యాప్తంగా 3వేల థియేటర్లలో రిలీజ్ చేయనున్నారు. సౌత్ ఇండస్ట్రీకి సంబంధించిన చిత్రం ఇంత భారీ స్థాయిలో విడుదల కావడం ఇదే మొదటిసారి!