ఇలియానాను పబ్లిక్ లో అగౌరవపరిచిన షారుఖ్!

Posted: 10/07/2014 04:51 PM IST

మనసులో వున్న అక్కసునంతా టాలీవుడ్ మీద వెళ్లగక్కేసి బాలీవుడ్ కి చెక్కేసిన గోవా బ్యూటీ ఇలియానాకు భారీగా అవమానం జరిగినట్లు తెలుస్తోంది. టాలీవుడ్ కంటే బాలీవుడ్ చాలా బాగుందని, అక్కడి స్టార్ హీరోలంతా తనను ఎంతగానో చేరదీసుకుంటున్నారని ఒకప్పుడు పేర్కొన్న ఇల్లీకి.. ఇప్పుడు ఆ ఇండస్ట్రీకి సంబంధించిన ఒక స్టార్ హీరో ఆమెను పబ్లిక్ లో అగౌరవపరిచాడని వార్తలు వస్తున్నాయి. ఆ స్టార్ హీరో మరెవ్వరో కాదు.. బాలీవుడ్ బాద్షా షారుఖ్ ఖాన్! ఇటీవలే షారుఖ్ సనసన ‘‘ఫ్యాన్’’ మూవీలో ఇలియానా నటిస్తున్నట్లు వచ్చిన వార్తల నేపథ్యంలో.. ఇప్పుడు షారుఖ్ ఆమెను ఇలా పబ్లిక్ లోనే అవమానించడం చర్చనీయాంశంగా మారిపోయింది.

యశ్ రాజ్ ఫిలిమ్స్ షారుఖ్ తో కలిసి నిర్మిస్తున్న ‘‘ఫ్యాన్’’ భారీ చిత్రాన్ని ‘‘బ్యాండ్ బాజా బారాత్’’ ఫేం మనీష్ శర్మ దర్శకత్వం వహిస్తున్నాడు. ఈ మూవీపై షారుఖ్ చాలా ఆశలే పెట్టుకున్నాడు. ఎందుకంటే.. ఇందులో ఈ బాద్షా పలురకాల గెటప్స్ వేయనున్నాడు. ఇందుకోసం షారుఖ్ ఇప్పటికే ఆ గెటప్స్ ను రెడీ చేసుకునే పనిలో బిజీ అయిపోయాడు. ఈ నేపథ్యంలోనే తాను సినిమాలోని కథానాయిక గురించి మాట్లాడుతూ.. ‘‘ఈ సినిమాకు స్టార్ హీరోయిన్ అవసరం లేదు. నటులపై ప్రేక్షకులు ఏర్పరుచుకునే అభిమానం ఎలా వుంటుందనే నేపథ్యం మీద ఈ సినిమాను రూపొందించడం జరుగుతోంది. ఇన్నాళ్లవరకు నేను నటించిన అన్ని సినిమాల్లోకంటే ఇది చాలా ఛాలెంజింగ్ గా కూడినది’’ అంటూ పేర్కొన్నాడు. తనవరకు బాగానే చెప్పుకున్నాడు కానీ.. ఈ సినిమాకు స్టార్ హీరోయిన్ అవసరం లేదనే విషయమే ఇక్కడ చర్చనీయాంశంగా మారిపోయింది.

ఈ సినిమాలో షారుఖ్ తో పాటు ఇలియానా ఎంపికైనట్లు ఇటీవలే వార్తలు షికార్లు చేసిన సంగతి తెలిసిందే! షారుఖ్ చెప్పిన మాటల ప్రకారం.. ఇలియానా స్టార్ హీరోయిన్ కాదని అర్థం! అంటే.. బాలీవుడ్ లో ఇతర హీరోయిన్లలాగా ఈ అమ్మడు బాగా పేరు సంపాదించుకోలేదని.. ఈ గోవా బ్యూటీకి ఆ స్థాయి లేదని ఆయన పేర్కొన్న మాటలనంతరం ప్రచారాలు కొనసాగుతున్నాయి. దీంతో ఈ అమ్మడికి పబ్లిక్ లోనే అవమానం జరిగినట్లైంది. ఇలియానా బాలీవుడ్ లో అడుగుపెట్టి ఇంకా కొన్నాళ్లు మాత్రమే అయింది కాబట్టి... ఆమెను కొత్త తారగా భావించి షారుఖ్ ఇలా కామెంట్లు చేశాడని ఆయన సన్నిహిత వర్గాలు పేర్కొంటున్నాయి. ఏదేమైనా.. ఇలియానాకు మాత్రం ఘోరమైన అవమానం జరిగిందని మీడియాలో వార్తలు జోరుగా కొనసాగుతున్నాయి.

AS