మోదీ వలన కిక్ కలెక్షన్లు దెబ్బతిన్నాయా?

Posted: 07/27/2014 03:11 PM IST

రవితేజ నటించిన తెలుగు కిక్ సినిమాకి హిందీ రూపాంతరమైన సల్మాన్ ఖాన్ నటించిన కిక్ సినిమా ప్రధాన మంత్రి నరేంద్ర మోదీ వలన దెబ్బతిన్నదిన్న వార్త సంచలనాన్ని సృష్టిస్తోంది.

సల్మాన్ ఖాన్ ని నరేంద్ర మోదీకి చేరువలో చూసిన ముస్లింల వలన కిక్ సినిమా కలెక్షన్లు దెబ్బతింటున్నాయని కొందరి భావన.  జయ్ హో హిందీ సినిమా విడుదలకు ముందు సల్మాన్ ఖాన్ మోదీని కలవటం జరిగింది.  మోదీ వెబ్ సైట్ ని ఉర్దూలో ప్రారంభించటానికి సల్మాన్ ఖాన్ తండ్రి సలీం ఖాన్ తోడ్పడ్డారు.  మోదీ ప్రమాణ స్వీకారం సమయంలో కూడా సల్మాన్ ఖాన్ హాజరవటం జరిగింది.  ఈ సంఘటనల వలన సల్మాన్ ఖాన్ సినిమాని ముస్లింలు చూడటానికి పోవటం లేదన్నది వాళ్ళ వాదన.  

అంటే హిందీ సినిమాలు చూసేవాళ్ళంతా సల్మాన్ ఖాన్ ముస్లిం కాబట్టి చూస్తున్నారా.  మోదీని కలిసిన తర్వాత మీడియా ప్రతినిధులతో సల్మాన్ ఖాన్ స్పష్టంగా తాను మాత్రం కాంగ్రెస్ అభ్యర్థి బాబా సిద్దిక్వికి వోటేస్తానని మోదీ సమక్షంలోనే చెప్పటం జరిగింది.  తాను కాంగ్రెస్ ఎమ్మెల్యేకి వోటు వేస్తానని, అది తన అభిప్రాయమని, మోదీ సమర్థుడనుకుంటే మిగతావాళ్ళు ఆయనకే వోటెయ్యవచ్చని సల్మాన్ ఖాన్ ఆ రోజు చెప్పారు.  

కేవలం ముస్లిం యువత చూస్తేనే సల్మాన్ ఖాన్ సినిమాలు ఆడుతాయన్నది, మోదీతో సల్మాన్ ఖాన్ ని చూసినంత మాత్రాన అతని ముస్లిం అభిమానులు ఆయన సినిమాని చూడటానికి పోరనేది అర్థం లేని వాదన.  పైగా ముస్లింలంతా మోదీకి వ్యతిరేకులు కారని 2014 ఎన్నికలు తెలియజేస్తున్నాయి.  

రంజాన్ రోజులు, ఈద్ దగ్గర్లో ఉంది కాబట్టి ముస్లింలలో పెరిగిన భక్తి ప్రపత్తులతో ఇస్లాం మీద అభిమానం ఎక్కువగా ఉండటం సహజమే కానీ దానికీ సినిమాకి సంబంధం లేదు.  పోనీ సినిమాలో ఇస్లాంకి వ్యతిరేకంగా ఏమైనా ఉంటే అనుకోవచ్చు కానీ సామాన్యమై యాక్షన్ ఫిల్మ్ చూడటానికి, అందులో హీరోని ప్రధానమంత్రికి సమీపంలో చూడటానికి ఏమైనా సంబంధం ఉంటుందా? 

అన్నిటికన్నా ముఖ్యంగా కిక్ విడుదలైన రోజున 26.4 కోట్లను వసూలు చేసింది, ఆ తర్వాత రెండు రోజుల్లోను 50 కోట్లకు పడగలెత్తింది.  ఇంతకన్నా సినిమానుంచి ఆశించేదేముంటుంది ఎవరికైనా.  ధూమ్ 3 36.32 కోట్లను, చెన్నై ఎక్స్ ప్రెస్ 33.12 కోట్ల రూపాయలను వసూలుచేస్తే వాటికి కంటే ఎంతో ఎక్కువ వసూళ్లైన 50 కోట్ల రూపాయలతో పోల్చి చూస్తే కిక్ కలెక్షన్లు పడిపోయినట్లా?

-శ్రీజ