దర్శకుడికి చెప్పా పెట్టకుండా సినిమా రిలీజ్

Posted: 04/10/2014 09:43 AM IST

పురాణాల్లో, ఎవరు నువ్వు అంటే, నేను మీ కుమారుడిని నాన్నగారూ అని కుర్రవాడు బదులిచ్చినట్లుగా, లేదా పెద్దలు కానీ భార్య కానీ చెప్పినట్లుగా, శేఖర్ కమ్ముల రూపొందించిన అనామికా చిత్రం విడుదలవుతున్నట్లుగా ఆయనకే తెలియదట.  అందరిలాగానే వార్తాపత్రికలలో చూసి తెలుసుకున్నారటాయన.

విడుదల చేస్తున్నామని అతనికి చెప్పటం కాదు నిజానికి దర్శకుడి సలహాతోనే నిర్మాతలు విడుదల తేదీని నిర్ణయించుకుంటారు. కానీ ఎండమోల్ సిని నిర్మాణ సంస్థ ఆ ఆనవాయితీలను పక్కకు పెట్టి, దర్శకుడి మీద తమకున్న నిరసనను ప్రదర్శించినట్లుగా కనపడుతోంది. 

ఇది అనైతికమంటూ సినీ దర్శకులు ఖండించారు.  దర్శకుడి పాత్ర కేవలం దర్శకత్వం వరకే కాకుండా మన రాష్ట్రంలో ఆ సినిమాకి విజయం సాధించటం వరకు ఉంటుంది.  అంటే ఇతర సినిమాల విడుదల దృష్ట్యా ఈ సినిమా విడుదలకు సరైన తేదీని నిర్ణయించటం, ప్రచారం, ప్రోమోలు, ఇంటర్వ్యూలు, విజయోత్సవాలు, ఇలా అన్నిటిలోనూ దర్శకుడు ప్రధాన పాత్రను వహించటం ఆనవాయితీ. 

కానీ వాటిని పట్టించుకోకుండా దర్శకుడికి ఇవ్వవలసిన ప్రాధాన్యతనివ్వకుండా ఒంటెద్దు పోకడతో ముందుకెళ్తున్న సినీ నిర్మాణ సంస్థను పలువురు తప్పుపడుతున్నారు.  అయితే శేఖర్ కమ్ముల ఈ విషయంలో అందుకు ప్రతికూలంగా ఎటువంటి వ్యాఖ్యానమూ చెయ్యలేదు. 

విద్యాబాలన్ ముఖ్యపాత్రలో నటించిన హిందీ సినిమా కహానీకి తెలుగు పునర్నిర్మాణమే అనామికా.  ఇందులో నయనతార ప్రధాన భూమికను నిర్వహించారు. 

ఈ చిత్రం కీరవాణి సంగీత దర్శకత్వంలో తెలుగు తమిళ్ భాషల్లో రూపొందింది.  ప్రఖ్యాత నవలా రచయిత యండమూరి వీరేంద్రనాథ్ ఈ సినిమాకి సంభాషణలను రాసారు. 

-శ్రీజ