పవన్ కళ్యాణ్ తో పోల్చుకుంటున్న సమంత

Posted: 01/18/2014 12:06 PM IST

మంచీ చెడూ, చిన్నా పెద్దా ఇలాంటివన్నీ పోల్చి చూసినప్పుడే దేనికైనా ఉంటాయి కదూ.  విడిగా చూస్తే దేన్నీ పెద్దదని అనలేమూ, దేన్నీ చెడ్డదనీ అనలేము.  ఇతర నటీమణులతో పోల్చి చెప్తూ తను నిజజీవితంలో నటించనని అంటోంది సమంత.  ఇతరులలా కాకుండా తాను మేకప్ తీసేసిన మరుక్షణం నుంచీ నటించటం మానేసి సహజసిద్ధంగానే ఉంటానని చెప్తోందీమె. 

అలాగే కొంతకాలం క్రితం పవన్ కళ్యాణ్ గురించి మాట్లాడుతూ ఆయన సెట్ లో ఉన్నప్పుడు పాత్రలో ఒదిగిపోయి నటుడిగా రాణిస్తారని, బయటకు రాగానే తిరిగి మామూలు పవన్ కళ్యాణ్ అయిపోతారని చెప్పిందామె.  ఇప్పుడు తన గురించి తాను చెప్పుకుంటూ చెన్నై లో ఒక సినిమా వేడుకలో తాను నిజజీవితంలో నటించనని చెప్పింది సమంత. 

ట్విట్టర్లోనూ బహిరంగంగానూ చేసే కామెంట్ల వలన వార్తలలో ఎప్పుడూ తాజాగా ఉంటారు కొందరు సుందరీమణులు.  అందులో సమంత కూడా ఉంటోంది ఈ మధ్య.  మహేష్ బాబు సినిమా 1 లో బీచ్ లో పాట చిత్రీకరణ విషయంలో కూడా అంతకు ముందు వికారంగా ఉందని వ్యాఖ్యానించి మహేష్ బాబు అభిమానుల ఆగ్రహానికి గురైనా, వార్తలలోకైతే వచ్చింది సమంత. 

నేను జీవితంలో అబద్ధమాడలేదు అన్నాడొక మనిషి.  ఇదే అన్నిటికన్నా పెద్ద అబద్ధమన్నాడు మరొకడా మాటలకు.  ఈ మాటలు వింటుంటే అదే గుర్తుకొస్తోంది.  నిజజీవితంలో కూడా నటించబట్టే ఆ సందర్భంలో ఆ విధంగా తన ప్రత్యర్థుల మీద కామెంట్ చెయ్యటం జరిగిందని కొందరు వెనకాల నవ్వుకున్నారు సమంత మాటలకు.

-శ్రీజ