జూహీ ఆంటీకి యాంటీ రోల్ భయం

Posted: 01/18/2014 02:31 PM IST

ఎప్పుడూ నవ్వు ముఖంతో అగ్రనాయకుల సరసన కథానాయకిగా అలరించిన హిందీ సినీ తార జూహీ చావ్లా భయపడుతోందంటే వేరే దుష్టపాత్రలకు కాదు.  తాను ధరించబోయే దుష్ట పాత్రకు. 

గులాబ్ గ్యాంగ్ అనే సినిమాలో జూహీ ఆంటీ యాంటీ రోల్ వేస్తోంది.  బుందేల్ ఖండ్ లో వాస్తవంగా జరిగిన మహిళా బృందాల విప్లవం, మహిళా స్వాతంత్ర్యాల గురించి చెప్పే కథను చిత్రీకరిస్తూ నిర్మిస్తున్న గులాబ్ గ్యాంగ్ స్క్రిప్ట్ జూహీకి బాగు నచ్చిందట కానీ అందులో తాను వెయ్యవలసిన విలనీ పాత్రలో తనను ప్రేక్షకులు ఆదరిస్తారా అన్న భయం పట్టుకుందామెకు. 

అంతకు ముందెప్పుడూ యాంటీ రోల్స్ వెయ్యని జూహీ ఈ సారి తనకా అవకాశం వచ్చినందుకు సంతోషాన్ని కూడా వెలిబుచ్చారు.  తాను అటువంటి పాత్రను చెయ్యగలనా అన్న భయమైతే పోయిందామెకు.  తనకున్న నటనానుభవంతో సులభంగానే ఆ పాత్రను పోషించగలిగింది.  కానీ తనను ఆ పాత్రలో ప్రేక్షకులు స్వీకరిస్తారా అన్నదే ఆమెకున్న భయం.

అయితే ఆ భయమేమీ అక్కర్లేదని కొందరు ఆమెకు ప్రోత్సాహమిచ్చినవారు, నీ రోజులు ఎప్పడో పోయాయిలేమ్మా.  నీ విషయం కాబట్టి నువ్వు గుర్తు పెట్టుకున్నావ్ కానీ, హిందీ సినిమా రంగంలో ఎంతోమంది వచ్చారు పోయారు.  ఈ సమయంలో నీకో ప్రాముఖ్యతగల పాత్ర లభించింది అందుకు సంతోషించు అని లోలోపల అనుకున్నారట. 

ఈ సినిమాలో నటించటానికి ఒప్పుకోవటానికి మరో కారణం అందులో మాధురీ దీక్షిత్ కూడా నటిస్తుండటమేనని కూడా అంటోంది జూహీ చావ్లా.  ఆమె చాలా అందమైన నటి అని, ఆమెతో పాటుగా నటించటం తనకు ఆనందాన్నిస్తోందని అన్న జూహీ పూర్వకాలంలో ఆమెతో నటించటానికి ఇష్టపడలేదు.  అందుకు కారణం ఇద్దరూ వయసులో ఉన్నవాళ్ళు, నాయికలుగా చలామణీ అవుతున్నవాళ్ళు, సినీ ప్రపంచంలో ఒకరికొకరు ప్రత్యర్థులు కాబట్టి.  కానీ ఇప్పుడు ఇద్దరూ భూతపూర్వ నటీమణులు కాబట్టి కలిసివుంటే కలదు సుఖం అనే సూత్రాన్ని పాటిస్తోంది జూహీ చావ్లా. 

-శ్రీజ