మహేష్ 1 లో పాతచింతకాయ పచ్చడి లోపం

Posted: 01/16/2014 11:56 AM IST

పిక్నిక్ కి వెళ్ళినా వేడుకలకు హాజరైనా అక్కడ కూడా తెలిసిన ముఖాలకోసమే వెతుక్కోవటం పరిపాటి.  అంతే కాదు ఆ వంకన తెలిసినవాళ్ళని కలవవచ్చని కూడా కొందరి ఆశ.  అంతేకానీ కొత్తవాళ్ళతో పరిచయం చేసుకుందాం, అవిధంగా తన సర్కిల్ ని పెంచుకుందాం అని అనుకునేవారు అరుదుగా కనిపిస్తారు.  అన్నిటికంటే ముఖ్యంగా ఏ వేడుకకోసమైతే అక్కడ కూడారో దాని సంగతి పక్కకు పెట్టి మిగతా కబుర్లలో పడేవారు కూడా అధికశాతంలోనే కనిపిస్తారు.

కానీ సినిమాకి పోయి కూడా పాత కథనాలకోసమే చూసేవారికోసమే పుట్టిందేమో- పండుగనాడు కూడా పాత మొగుడేనా అన్న సామెత లేక పాతచింతకాయ పచ్చడి అనే వ్యావహారిక పదాలు.

మహేష్ బాబు నటించిన 1, నేనొక్కడినే మీద వివిధ వ్యతిరేకమైన వ్యాఖ్యానాలు వార్తల్లో వస్తున్నాయి.  అందుకు కారణం కథలోని కొత్తదనం, పాత్రలు తక్కువగా ఉండటం, వినోదం పాలు తక్కువుండటం, సీరియస్ గా దర్శకుడు తన కధని చెప్పుకుపోవటం, అదేమో మేధస్సుని సవాల్ చేసే కథ అవటం.

మన ప్రేక్షకులు తెలియని హీరోల విషయంలో భిన్నమైన కథని, సీరియస్ గా ఉండే విషయాలను అంగీకరిస్తారు.  కానీ తెలిసిన హీరో, సూపర్ స్టార్ ముద్రవేసుకున్న హీరో విషయంలో ఒక చట్రంలో బిగించి అందులోనే చూడదలచుకుంటారు.  మానసిక శాస్త్రంతో సంబంధమున్న అపరిచితుడు, గజని, చంద్రముఖి లాంటి సినిమాలు

ఆదరణను పొందాయంటే కథలో వినోదానికి కూడా సమానంగా భాగమివ్వటమే కారణం.  
అదే వేరే భాషలోని చిత్రమైతే ఇంగ్లీష్ కానీ హిందీ చిత్రాలలో పూర్తిగా కథకే ప్రాధాన్యతనిచ్చినవి జనాదరణ పొందినవి కూడా చాలా ఉన్నాయి.  పూర్తి యాక్షన్ సినిమాలు- ట్రాన్స్ పోర్టర్, ఓషన్స్, బోర్న్ ఐడెండిటీ సిరీస్ కూడా ఆదరణకు నోచుకున్నాయి.  కానీ తెలుగులోకి వచ్చేసరికి మనకో చిక్కని కథతో పాటు సెంటిమెంట్, దానితో పాటు కడుపుబ్బ నవ్వించే సన్నివేశాలు కావాలి.  ఇక ఫ్యాన్స్ దండిగా ఉన్న స్టార్ నటించిన సినిమాకి వచ్చేసరికి అవన్నీ ఇంకా ఎక్కువ స్థాయిలో ఉండాలి.

అక్కడే దెబ్బతిన్నది మహేష్ 1, నేనొక్కడినే సినిమా.  రొమాన్స్, స్టంట్స్, సరికొత్త కథ ఉంది బాగానే ఉంది, నంజుకోవటానికి ఆవకాయ లా ఒక ఐటమ్ సాంగ్ కూడా ఉంది చాలా సంతోషం కానీ వినోదమేది.  బ్రహ్మానందం ఎక్కడ, అలీ కానీ, ఎమ్ ఎస్ నారాయణ కానీ లేరే.  దూకుడు, బిజినెస్ మన్ రాణించాయంటే ముక్కుకు సూటిగా కథను చెప్పకుండా మధ్యలో కథలో భాగంగా నవ్వించే ప్రయత్నం చెయ్యటమే.  

-శ్రీజ