డబుల్ యాక్షన్ లో కిరణ్ పై ఫైర్ అయిన నేతలు

Posted: 08/23/2013 09:58 AM IST

సీమాంద్రనేతలు ఇప్పుడు రాష్ట్ర ముఖ్యమంత్రి నల్లారి కిరణ్ కుమార్ రెడ్డి పై మండిపడుతున్నారు. మమల్ని మోసం చేశారు..బలిపశువులు చేశారు..విషయాన్ని దాచి పెట్టారు..అంటూ నేతలు గగ్గోలు పెడుతున్నారు. కిరణ్ కుమార్ రెడ్డి డ్యూయల్ రోల్ పోషిస్తున్నారని నేతలు మండిపడుతున్నట్లు తెలుస్తోంది. ఆయన వ్యవహార శైలి తీరుపై స్వంత పార్టీ నేతలే అసంతృప్తి వ్యక్తం చేస్తున్నట్లు సమాచారం. కేవలం కిరణ్ ఇమేజ్ కోసం తమను బలి చేస్తున్నారని ఆవేదన చెందుతున్నారని కాంగ్రెస్ పార్టీ నేతలు వాపోతున్నారు. రాష్ట్ర విభజన అంశం ముఖ్యమంత్రికి తెలిసినా దాచి పెట్టారని ఆక్రోషం వెళ్లగక్కుతున్నారు. దీనివల్ల తాము స్వంత నియోజకవర్గాల్లో తిరుగలేకపోతున్నామని సదరు ఎమ్మెల్యేలు ఆవేదన వ్యక్తం చేస్తున్నారని మీడియా వర్గాలు అంటున్నాయి. సీడబ్ల్యూసీ ప్రకటన వచ్చిన తరువాత కిరణ్ సమైక్య గళం వినిపిస్తున్నా ఆయన ఏజెండా ఏమిటో అంతు పట్టడం లేదని నేతల మధ్య హాట్ హాట్ గా చర్చలు జరుగుతున్నాయి. ఆయన వ్యూహాత్మకంగానే సమైక్య వాదాన్ని వినిపిస్తున్నారని కొందరు సీమాంధ్ర నేతలు భావిస్తున్నారు. తన ఇమేజ్ పెంచుకునేందుకు పథకాలు వేస్తున్నారని అభిప్రాయపడుతున్నారు. ఈ వైఖరితో ప్రజల నుండి తమకు ఒత్తిడి పెరుగుతుందని మథనపడుతున్నారు. దీంతో తమపై రాజీనామాల డిమాండ్ పెరిగిపోతోందని ఆవేదన చెందుతున్నారు. ఢిల్లీ విధేయుడిగా ఉంటూ, మరోవైపు తన సన్నిహితుల ద్వారా ఇమేజ్ పెంచుకునేందుకు ప్రచారం చేస్తున్నారని మండిపడుతున్నారు. సిఎం డ్యూయల్ రోల్ తోనే కథ ఇంతవరకు వచ్చిందనే విషయాన్ని సీమాంద్ర ప్రజల ముందుకు పెడతామని సీమాంద్ర నాయకులు సీఎం ను హెచ్చరినట్లుగా గాంధీభవన్ లో కాంగ్రెస్ కార్యకర్తలు గుసగుసలాడుకుంటున్నారు.