బావ కోసం బయటకు వచ్చిన సీతయ్య?

Posted: 08/03/2013 06:41 PM IST

తెలుగుదేశం పార్టీ అధినేత చంద్రబాబు నాయుడు బావమరిది నందమూరి హరిక్రిష్ణ మౌనం వీడి జనస్రవంతిలో కలిసిపోయారు. ఇటీవల జరిగిన పంచాయతీ ఎన్నికల ఫలితాలపై సీతయ్య స్పందించారు. రాష్ట్రంలో మూడు దశల్లో జరిగిన గ్రామ పంచాయతీ ఎన్నికల్లో ప్రజలు తెలుగుదేశం పార్టీకి పట్టం కట్టారని తెలిపారు. కాంగ్రెస్ అధికార దుర్వినియోగం, వైఎస్సార్‌సీపీ అవినీతిని ప్రజలు తిరస్కరించారన్నారు. ఈ ఎన్నికల సరళిని విశ్లేషిస్తే ప్రజలు తమ పక్షానే ఉన్నారని అర్థమవుతోందన్నారు. టీడీపీకి పట్టం కట్టిన ప్రజలకు ఆయన కృతజ్ఞతలు తెలిపారు. రాష్ట్రంలో మూడు విడతలుగా నిర్వహించిన పంచాయతీ ఎన్నికల్లో తెలుగుదేశం పార్టీ కాంగ్రెస్‌కు దీటుగా నిలిచింది. ఆ పార్టీ అధికార దుర్వినియోగానికి పాల్పడినా, క్షేత్ర స్థాయిలో ఉన్న బలంతో తెలుగుదేశం మంచి ఫలితాలు సాధించింది. రాష్ట్ర విభజన సమస్యపై ద్వంద్వ వైఖరి అవలంభించి ఇబ్బందుల్లో పడినప్పటికీ, ఇటు తెలంగాణలోనూ, అటు సీమాంధ్రలోనూ పార్టీ పుంజుకుంది. కాంగ్రెస్ పార్టీ 6 వేలకు పైగా పంచాయతీలను సాధించగా, అదే స్థాయిలో టీడీపీ కూడా విజయం దక్కించుకుంది. తెలంగాణా రాష్ట్రం పై మాట్లాడుతూ రెండు చోట్ల అధికారం చేజించుకొనే ఆవకాశం ఒక్క తెలుగుదేశం పార్టీకే ఉందన్నారు. కేంద్రంలో కాంగ్రెస్ శకుని పాత్ర పోషిస్తుందన్నారు. రాబోయే ఎన్నికలలో కాంగ్రెస్ను ఇరు ప్రాంతాల ప్రజలు మట్టికరిపిస్తారని సీతయ్య జోస్యం చెప్పారు. రాష్ట్ర విభజన జరిగిన నేపథ్యంలో సీతయ్యలో కొత్త కోరికలు పుట్టినట్లుగా ఉందని అందుకే .. ఎన్నడు లేనిది సీతయ్య ఎన్టీఆర్ భవన్ లో వచ్చి సందడి చెయ్యటం జరిగిందని టిడిపి నాయకులు అంటున్నారు. అంతే రెండు రాష్ట్రాలు అయితే టిడిపి జాతీయ పార్టీ అవుతుంది కాబట్టి, అప్పుడు సీతయ్య మనసులో ఉన్న కోరిక నేరవేరుతుందనే ఉద్దేశంతో చంద్రబాబును, టిడిపి ని పొగిడినట్లు తెలుగుదేశం కార్యకర్తలు ఎన్టీఆర్ భవన్ లో చెప్పుకుంటున్నారు.