ఓటర్లకు పబ్ ల ఎర

Posted: 05/05/2013 11:15 AM IST

కర్నాటకలో ఈ రోజు విధాన సభ ఎన్నికలు జరుగుతున్నాయి.  ప్రముఖులంతా ఓటు వేసి వచ్చి తమవంతు వ్యాఖ్యానాలు చేస్తునేవున్నారు.  భాజపా నేతలైతే కాంగ్రెస్ ఓడిపోవటం ఖాయమని, కాంగ్రెస్ నేతలైతే భాజపాతో ప్రజలు విసిగిపోయారు కాబట్టి భాజపా పోవటం ఖాయమని చెప్తూ వచ్చారు.  

భాజపా పార్టీ రాష్ట్ర అధ్యక్షుడు ప్రహ్లాద జోషి ఓటు వేసి వచ్చి, ఈ సారి కూడా విజయం మాదే నని, భారీ మెజార్టీ కూడా వస్తుందని జోస్యం చెప్పారు.  కేంద్ర మంత్రి వీరప్ప మొయిలీ కూడా తన ఓటు హక్కుని వినియోగించుకుని కాంగ్రెస్ కే ప్రజలు పట్టం కడతారంటూ తన ఆకాంక్షను వెల్లడి చేసారు.  వెంకయ్యనాయుడు కూడా కర్నాటకలో తన ఓటు హక్కుని వినియోగించుకున్నారు.

ఎవరి ఆశలు, ఆకాంక్షలు వారికుంటాయన్నది సరే కానీ మరీ భాజపా దిగజారుడు ఎన్నికల ప్రచారాన్నే చాలామంది తప్పుపడుతున్నారు.  మేము అధికారంలోకి వస్తే మీకు ఈ సౌకర్యం కలిగిస్తాం, అది చేస్తాం, ఇది చూపిస్తాం అంటూ ఎన్నో హామీలు ఇస్తుంటారన్నది అందరికీ తెలిసిందే.  ఎక్కువగా ప్రజా సంక్షేమ పథకాల బాటలో మన రాష్ట్రం పోతుంటే, పొరుగు రాష్ట్రంలో మాత్రం నగరవాసుల ఓట్లను ఆకర్షించటానికి భాజపా సరికొత్త ఆఫర్ ఇచ్చింది.

అదేమిటంటే, పబ్ లను ఒంటి గంట వరకు అనుమతిస్తారట.  అందరూ ముక్కున వేలేసుకునేట్టుగా, ప్రస్తుతం 11.30 వరకే అనుమతి ఉన్న పబ్ లను మాకు అధికారం కట్టబెడితే మిమ్మల్ని ఒంటిగంట వరకు పబ్ లలో గడపనిస్తామన్నారు భారతీయ జనతా పార్టీ ప్రచారకులు.  హైద్రాబాద్ లో రాత్రి పూట అసలు ఆడవాళ్ళకే అనుమతి లేదంటున్నారు మన రాష్ట్ర అధికారులు.  

మనకు వచ్చే ఎన్నికల్లో ఇంకా ఎన్ని వింత ఆఫర్లు వస్తాయో చూడాలి.  

-శ్రీజ