Posted: 09/04/2012 05:35 PM IST

హీరోయిన్లు సాహసాలు చేయడం హాలీవుడ్‌లో పరిపాటి. ఇండియన్ సినిమా విషయానికొస్తే... అడపాదడపా కొందరు హీరోయిన్లు ఫైట్లూ గట్రా చేసేసి ‘మేమూ ఏం తక్కువ కాదు’ అని నిరూపించుకున్నారు. అయితే... ఈ మధ్య బాలీవుడ్‌లో మాత్రం కథానాయికల సాహసాలు కాస్త ఎక్కువయ్యాయి. ఈ ట్రెండ్‌ని వేగవంతం చేసిన ఘనత మాత్రం కత్రినాకైఫ్‌దే. ఆ మధ్య కొన్ని సినిమాల్లో ధైర్యంగా బైక్ రైడింగ్‌లు చేసేసి ఆడియన్స్‌ని షాక్‌కు గురి చేశారు కైట్స్.ఆ తర్వాత బిపాసాబసు, అనుష్కశర్మ, నర్గీస్ ఫక్రీ లాంటి తారలు కూడా కత్రినాను అనుసరించి సక్సెస్ అయ్యారు కూడా. ఇప్పుడు వారి లిస్ట్‌లోకి అనిల్‌కపూర్ ముద్దుల తనయ సోనమ్‌కపూర్ కూడా చేరబోతున్నారు. ‘బాగ్ మిల్కా బాగ్’ అనే సినిమాలో ప్రస్తుతం నటిస్తున్నారు సోనమ్. పాత్రోచితంగా ఆ సినిమాలో ఆమె బైక్ రైడింగ్ సన్నివేశాల్లో నటించాల్సి ఉంది. పైగా దర్శకుడు ఓం ప్రకాష్ ఆ సన్నివేశాలను రియలిస్టిక్‌గా తెరకెక్కించాలని నిర్ణయించుకున్నారు.

ఈ విషయాన్ని సోనమ్‌కు ఆయన విశదపరిస్తే... చిరునవ్వుతోనే సోనమ్ అంగీకారం తెలిపారట.అసలు విషయం ఏంటంటే... సోనమ్‌కు బైక్ రైడింగ్ రాదు. గతంలో ‘ప్లేయర్స్’ సినిమా కోసం ఆమె బైక్ రైడింగ్ చేసినా... అది చాలా చిన్న సన్నివేశం. దాంతో డూప్‌ని పెట్టి ఎలాగోలా మేనేజ్ చేసేశారు. కానీ ఈ సినిమా విషయంలో మాత్రం దర్శకుడు ‘నో’ డూప్ అనేశాడట. ఆయినా ఈ ముద్దుగుమ్మ వెనకంజ వేయకుండా ‘ఓకే’ చెప్పేశారు. ఓ ట్రైనీని పెట్టుకొని రైడింగ్‌లో కఠినమైన మెళకువలు నేర్చుకుంటున్నారట సోనమ్. కొసమెరుపు ఏంటంటే.. తండ్రి అనిల్‌కపూర్ కూడా సోనమ్‌కు బైక్ రైడింగ్ పాఠాలు నేర్పుతున్నారని సమాచారం.