Posted: 08/05/2012 02:42 PM IST

        గత కొంతకాలంగా ప్రశాంతంగా ఉన్న రాష్ట్రం మళ్లీ ప్రాంతీయవాదాలతో ఉక్కిరిబిక్కిరయ్యే సూచనలు కనిపిస్తున్నాయి. ఆగస్టు 20నుంచి మళ్లీ తెలంగాణ ఉద్యమాన్ని చేపడుతామని టీఆర్ఎస్ అధినేత కేసీఆర్ తాజాగా ప్రకటించారు. రవీంద్రభారతిలో జరిగిన స్వామిగౌడ్ అభినందన సభకు హాజరైన ఆయన కేంద్రం తెలంగాణ ఇస్తుందని తాను భావించటం లేదన్నారు. ఢిల్లీ నేతగా తనకు సిగ్నల్స్  ఉన్నాయని చెప్పారు. తెలంగాణ ఏర్పడిన తర్వాత  ఈ ప్రాంత ఉద్యోగులకు.. కేంద్ర ప్రభుత్వఉద్యోగులతో సమానంగా వేతనాలు ఇప్పిస్తామన్నారు. స్వామిగౌడ్  పదవీవిరమణ సందర్భంగా ఆయనను టీఆర్ ఎస్ లోకి ఆహ్వానించారు. ఎన్ని ఆవాంతరాలు ఎదురైనా సకల జనుల సమ్మె చేసినట్లు స్వామిగౌడ్ తెలిపారు.
     కళాకారులు, రాజకీయనేతలు ముందుండి తమను ఉద్యమంలోకి నడిపించారన్నారు. టీఎన్జీఓలో నుంచి బయటకు వెళ్లినా ఉద్యమంలో కొనసాగుతానని స్పష్టం చేశారు. తమ ప్రాణాలైనా అర్పించి  తెలంగాణ సాధించుకుంటామని  కాంగ్రెస్ నేత కేశవరావు అన్నారు. తెలంగాణ ప్రజలకు వాగ్ధానం ఇచ్చి మోసం చేసిన కాంగ్రెస్ కు ప్రజలు బుద్ధిచెప్పాలన్నారు. అన్ని పార్టీలు కలిసి కేంద్రంపై ఒత్తిడి తెస్తే పదిహేను రోజుల్లో తెలంగాణ వస్తుందన్నారు. తెలంగాణ ఉద్యమంలో తనవంతు పాత్ర పోషించిన స్వామిగౌడ్ పై వక్తలు ప్రశంసల జల్లులు కురిపించారు. ఆయన సేవలను నేతలు కొనియాడారు.
     అటు రాష్ట్రంలో ఇరవై ఏడేళ్లుగా అమలుకాని ఏకైక జీవో 610 ఒక్కటేనని టీఆర్ఎస్ ఎమ్మెల్యే ఈటెల రాజేందర్ అన్నారు. తెలంగాణలో పుట్టడమే విద్యార్థులకు శాపంగా మారిందన్నారు. సమైక్య రాష్ట్రంలో తెలంగాణ ప్రాంతానికి అన్ని రంగాల్లో నష్టం జరిగిందన్నారు. ప్రత్యేక రాష్ట్రం వస్తేనే బడుగు బలహీనవర్గాలకు న్యాయం జరుగుతుందన్నారు.

...avnk