Posted: 07/30/2012 05:03 PM IST

       స్పెయిన్ లో సాధారణంగా అయితే ఈ సమయంలో పర్యాటక రంగం బిజీగా వుంటుండటంతో ఉద్యోగావకాశాలు పెరుగుతూ నిరుద్యోగిత తగ్గుముఖం పడుతుండాలి. అందుకు భిన్నంగా ఈ ఏడాది ప్రభుత్వ పొదుపు చర్యల పుణ్యమా అంటూ దాదాపు 53 వేల మంది ఉద్యోగాలు పోగొట్టుకుని రోడ్డున పడటంతో నిరుద్యోగం రికార్డు స్థాయికి చేరింది. 18ఏళ్ల క్రితం స్పెయిన్ లో సంభవించిన మాంద్యంలో నిరుద్యోగులైన వారి రికార్డును ఈ సంఖ్య బద్దలు కొట్టింది. దక్షిణ, పశ్చిమ స్పెయిన్  ప్రాంతంలోని కేనరీ ఐలండ్స్ లో ప్రతి ముగ్గురిలో ఒకరు నిరుద్యోగిగా మారారని ప్రభుత్వ లెక్కలున్నాయి. ప్రస్తుతం నిరుద్యోగులుగా వున్న వారిలో దాదాపు 50శాతానికి పైగా గతేడాది కాలంగా ఎటువంటి ఉపాధి అవకాశాలు లేకుండా తిరుగుతున్న వారేనని ప్రభుత్వ గణాంకాలు వివరించాయి. ప్రాంతీయ, స్థానిక సంస్థలు, ప్రభుత్వం తన వ్యయంలో భారీగా కోతలు పెడుతుండటంతోప్రభుత్వ రంగ సంస్థల్లో ఉద్యోగుల సంఖ్య 5 శాతానికి పైగా పడిపోయింది.
   ఇదే సమయంలో టౌన్ హాల్స్  తమ సిబ్బందిని 11శాతానికి పైగా తగ్గించుకున్నాయి. ప్రస్తుత ఆర్థిక సంక్షోభం మరో ఏడాది కొనసాగే సూచనలున్నాయని, ఆర్థిక వ్యవస్థ ఈ ఏడాదితో పాటు వచ్చే ఏడాది కూడా కోలుకునే సూచనలు కన్పించటం లేదని ప్రభుత్వం చెబుతోంది. దీంతో కొత్తగా ఉద్యోగావకాశాలు కల్పించే పరిస్థితి లేదని తెగేసి చెబుతోంది. పార్ట్ టైమ్  ఉద్యోగులకు ప్రభుత్వం నుంచి ఎటువంటి సాయం అందటం లేదు. కేవలం మాడ్రిడ్  నగరంలోని 60 శాతం మంది నిరుద్యోగులకు మాత్రమే ప్రభుత్వం నుంచి నామమాత్రపు ఆర్థిక ప్రయోజనాలు అందుతున్నాయి. ఎటువంటి సంపాదనాపరులు లేని కుటుంబాల సంఖ్య ఇప్పుడు 17లక్షలకు చేరుకుంది. యూరోను పరిరక్షించుకునేందుకు తాము అన్ని చర్యలు తీసుకుంటామని ఐరోపా కేంద్ర బ్యాంకు ప్రకటించటంతో స్పెయిన్  రుణభారంపై కొంత మేరకు సాంత్వన లభించినట్లయింది. స్పెయిన్ ఆర్థిక వ్యవస్థను ఆదుకునే చర్యల్లో భాగంగా స్పానిష్ రుణభారాన్ని కొనుగోలు చేసేందుకు ఐరోపా కేంద్ర బ్యాంకు సంసిద్ధత వ్యక్తం చేసింది.

...avnk