Posted: 07/28/2012 02:28 PM IST

       దొంగనాన్న మొత్తానికి పట్టుబడ్డాడు. మాజీ గవర్నర్ ఎన్డీ తివారీకి ఎదురు దెబ్బ తగిలింది. రోహిత్ శేఖర్‌కు ఆయనే అసలైన తండ్రి అని న్యాయస్థానం తేల్చి చెప్పింది. కాంగ్రెస్ పార్టీ సీనియర్ నేతగా.. మాజీ ముఖ్యమంత్రిగా, కేంద్ర మాజీ మంత్రిగా, మాజీ గవర్నర్‌గా తనకు ఉన్న పలుకుబడితో ఆయన ఎన్ని కుయుక్తులు పన్నినా.. చివరికి న్యాయమే గెలిచింది. భారతదేశ రాజకీయ చరిత్రలో ఓ నాయకుడు ఇటువంటి పితృత్వ కేసును ఎదుర్కోవడం.. కోర్టు మెట్లెక్కడం ఇదే తొలిసారి కావడం గమనార్భం. తాజాగా  తివారీ, రోహిత్‌ల డీఎన్ఏ నివేదికను తెరిచిన ఢిల్లీ హైకోర్టు... "రోహిత్ అసలు తండ్రి (బయలాజికల్ ఫాదర్) ఎన్డీ తివారీయే. ఆయన అసలు తల్లి ఉజ్వలా శర్మే'' అని న్యాయస్థానం తేల్చి చెప్పింది.
      ఈ ముగ్గురికీ డీఎన్ఏ పరీక్షలు జరిపి డీఎన్ఏ ఫింగర్ ప్రింటింగ్, డయాగ్నస్టిక్స్ సెంటర్ (సీడీఎఫ్‌డీ), హైదరాబాద్ సీల్డు కవర్‌లో ఇచ్చిన నివేదికను జస్టిస్ రెవ ఖేత్రపాల్ తన చాంబర్‌లో తెరిచారు. రోహిత్ శేఖర్ న్యాయవాదులు, ఆయన తల్లి ఉజ్వలా శర్మ సమక్షంలో నివేదికను చదివి, కిక్కిరిసిన కోర్టు హాలులో పరీక్షల ఫలితాన్ని ప్రకటించారు. "సాయంత్రం 4 గంటలు అవుతున్నప్పటికీ తివారీ తరపున ఎవరూ కోర్టులో హాజరు కాలేదు. అంతేకాదు ఈ కేసును వాయిదా వేయాలని కూడా తివారీ తరపున ఎవరూ విజ్ఞప్తి చేయలేదు. సీడీఎఫ్‌డీ అందించిన సీల్డు కవర్‌ను తెరిచాం. పరీక్షల ఫలితాల ప్రకారం తివారీయే రోహిత్ శేఖర్ అసలు తండ్రి. ఉజ్వలా శర్మ అతని అసలు తల్లి'' అని జస్టిస్ ఖేత్రపాల్ ప్రకటించారు.

...avnk