Posted: 07/22/2012 02:10 PM IST

       చేనేత కార్మికుల కష్టాలపై వైఎస్సార్ కాంగ్రెస్ గౌరవ అధ్యక్షురాలు విజయమ్మ 23న కరీంనగర్ జిల్లా సిరిసిల్లలో చేపట్టనున్న దీక్ష వివాదాస్పదమవుతోంది. చేనేత దీక్షకు పోలీసులు అనుమతిచ్చినా టిఆర్ఎస్ నేతలు మాత్రం అడ్డుకుని తీరుతామంటున్నారు. విజయమ్మ పర్యటన మరో మానుకోటలా మారి అనుకోని సంఘటనలు జరిగితే దానికి ప్రభుత్వం, వైఎస్ఆర్సీపీలదే బాధ్యతని హెచ్చరించారు. తెలంగాణకు అనుకూలంగా వున్నామని కేంద్ర హోంమంత్రి చిదంబరానికి లేఖ ఇచ్చిన తరువాతే సిరిసిల్లలో అడుగు పెట్టాలని గులాబీ నేతలు డిమాండ్ చేస్తున్నారు.
     తెలంగాణాలో పుణ్యక్షేత్రాల దర్శనానికి వస్తే తమకు అభ్యంతరం లేదనీ తెలంగాణాపై స్పష్టమైన వైఖరి చెప్పకుండా రాజకీయ ప్రయోజనాల కోసం వస్తే నిరసన తప్పదని జేఎసి ఛైర్మన్ కోదండరాం అన్నారు. అలాగే తెలంగాణకు అనుకూలమని వైఎస్ఆర్సీపి ప్రకటిస్తే నియోజకవర్గ ప్రజలతో తాను కూడా దీక్షకు మద్దతిస్తామని సిరిసిల్ల ఎమ్మెల్యే కేటిఆర్ చెప్పారు. విజయమ్మకు సాదర స్వాగతం పలుకుతామన్నారు. అయితే తెలంగాణ నేతలపై వైఎస్సార్ కాంగ్రెస్ నేతలు మండిపడుతున్నారు. మూడు నెలల్లో తెలంగాణ వస్తుందని కెసీఆర్ చెప్పినప్పుడు తమ పార్టీ వైఖరితో పనేంటని అడుగుతున్నారు. విజయమ్మ పర్యటనతో తెలంగాణ రాష్ట్ర ఏర్పాటు ఎలా ఆగిపోతుందో చెప్పాలని డిమాండ్ చేస్తున్నారు. ఇప్పటికే విజయమ్మ పర్యటనను నిరసిస్తూ నిరసన కార్యక్రమాలు చేపట్టిన టిఆర్ఎస్ విద్యార్ధి విభాగం 23న సిరిసిల్ల బంద్ కు పిలుపునిచ్చింది.

....avnk